घरभित्र कोठामा सुतिरहेका आमा छोरालाई चितुवाले आक्रमण गर्यो
भञ्ज्याङ न्यूज
तनहुँको व्यास नगरपालिका-११ पातीघारीमा घरभित्र कोठामा सुतिरहेका आमा छोरालाई गएराती चितुवाले आक्रमण गरी घाइते बनाएको छ ।
कोठा भित्र चितुवा पसेर आक्रमण गर्दा ४९ वर्षीय दिलमाया गुरुङ र उनका ९ वर्षीय छोरा शंकर गुरुङ घाइते भएको जिल्ला प्रहरी कार्यालय तनहुँले जनाएको छ ।
आइतबार राताी करिब १२ः३० बजेको समयमा घरभित्र कोठामा सुतिरहेको अवस्थामा चितुवाले आमा छोरालाई आक्रमण गरेको प्रहरी नायव उपरीक्षक युवराज खड्काले बताए ।
उनले भने, ‘नयाँ बन्दै गरेको आफ्नै घरमा आमाछोरा एउटै कोठामा सुतिरहेका रहेछन् । चितुवा कोठामा छिरेर सुतिरहेको छोरालाई आक्रमण गरेछ । थाहा पाएर लखेट्न खोज्दा आमालाई पनि चितुवाले आक्रमण गरी घाइते बनाएको छ ।’
नयाँ बन्दै गरेकाले घरमा झयाल ढोका राख्न नभ्याएका कारण उनीहरू त्यतिकै कोठामा सुत्दैआएका थिए । छोराको बायाँ कानमाथि टाउँकोमा ४ वटा नग्रा गढेको घाउँ भने आमाको वायाँ हात र हत्केलामा चितुवाले दाँत गाडेको दमौली अस्पतालको इमर्जेन्सी वार्डका अहेव महेन्द्र गौतमले जानकारी गराए ।
आमाछोराको अवस्था सामान्य रहेको र दमौली अस्पतालमा प्राथमिक उपचार गरी घर फर्किएका छन् । पछिल्लो समय तनहुँमा चितुवा आतंक बढ्दै गएको छ ।
