मतदाता रिझाउन पौडेल भन्छन् : ‘मैले हार्नु भनेको तपाईंहरूले आफैंलाई हराउनु हो’
भञ्ज्याङ न्यूज
सातौपटक चुनावी मैदानमा उत्रिएका नेपाली कांग्रेसका वरिष्ठ नेता रामचन्द्र पौडेल अहिले आफ्नो निर्वाचन क्षेत्रका मतदाताको घरदैलोमा पुग्न थालेका छन् ।
मंसिर-४ गते हुने प्रतिनिधिसभा र प्रदेशसभा सदस्य निर्वाचनका लागि तनहुँ-१ बाट प्रतिनिधिसभा सदस्यको उम्मेदवार बनेका नेता पौडेलले आफूले हार्नु भनेको तनहुँले हारेको जस्तै भएकाले भोट माग्न आवश्यक नभएको भन्दै मतदातालाई रिझाउन थालेका छन् ।
व्यास-१० को दुम्सिचौर र श्रीभञ्ज्याङ्ममा मंगलबार घर दैलो गर्दै उनले भने, ‘तनहुँ भनेको मेरो आफ्नो घर हो । त्यसैले भोट माग्नुपर्छ जस्तो लाग्दैन । तपाईंहरूले आफैँलाई जिताउनु हो । आफैँलाई हराउनु हो । त्यसैले भोट माग्ने कुरा होइन । मिलेर काम गर्ने हो ।’
आफ्नो निर्वाचन क्षेत्रमा घर दैलो कार्यक्रम गर्दै हिड्का पौडेलले अहिलेसम्मको उलपब्धि रक्षा गर्नको लागि गठबन्धन बनेको दाबी गरेका छन् । उनले आफूहरूले विकास निर्माणका लागि राजनीति गरेको समेत बताए ।
उनले भने, ‘अहिलेसम्मको उपलब्धि खतरामा परेपछि कस्तो अवस्थामा गठबन्धन निर्माण भएको सबैलाई थाहा छ । हामीले संविधान, लोकतन्त्र र गणतन्त्रलाई बचाउन गठबन्धन गरेका हौँ ।’
समयसँग आवश्यकता बढ्दै जाने भएकाले क्रमबद्ध रूपमा विकास निर्माणलाई अगाडि बढाएको पौडेलको भनाइ थियो ।
‘हामीले सकेको गरेको छौं विकासकै लागि हामीले राजनीति गरेका हौँ । विकासविनाको राजनीति खोक्रो हुन्छ’ उनले भने, ‘हामीले राजनीति जोगाएर विकास गरेका छौँ । एकैचोटि सबै कुरा हुँदैन । आवश्यकता बढ्दै जान्छ त्यही अनुसार काम अगाडि बढाउनुपर्छ ।’
