दमौलीमा अन्तरविद्यालय बास्केटबल रनिङशिल्ड प्रतियोगिता

तनहुँको दमौलीमा अन्तरविद्यालय बास्केटबल रनिङशिल्ड प्रतियोगिता सञ्चालन गरिएको छ । हैरान्स क्लवले व्यास नगरपालिका-३ मा सोमबारदेखि प्रथम अन्तरविद्यालय रनिङशिल्ड बास्केटबल प्रतियोगिता सञ्चालन गरेको हो ।

खेलमार्फत् पर्यटन प्रबर्द्धन र बास्केटबल खेलाडी उत्पादन गर्ने उद्देश्यसहित बास्केटबल प्रतियोगिता आयोजना गरिएको क्लवका अध्यक्ष रविन पौडेलले बताए । पछिल्लो समय जिल्लामा बास्केटबल खेलतर्फ आकर्षण बढ्न थालेकाले विद्यालय स्तरदेखि नै विद्यार्थीलाई बास्केटबलप्रति रुची बढाउन प्रतियोगिता आयोजना गरिएको उनले बताए ।

प्रतियोगिताको शुभारम्भ गर्दै व्यास नगरपालिका-२ का वडाध्यक्ष काशीराम श्रेष्ठले बास्केटबलको राम्रो सम्भावना रहेकाले अनुशासित भई कला प्रदर्शन गर्न आग्रह गरे । श्रेष्ठले बास्केटबल खेल विकासका लागि नगरपालिकाका तर्फबाट सहयोग रहने प्रतिबद्धता व्यक्त गरे ।

क्लवका सल्लाहकार एवं वडा सदस्य सुरेश वाग्लेले बास्केटबलको सम्भावना भएकाले केही समय अगाडी मात्रै व्यास नगरपालिकाले राष्ट्रपति रनिङशिल्डमा बास्केटबल खेललाई समावेश गरेको बताए ।

मंगलबारसम्म सञ्चालन हुने प्रतियोगितामा छात्रतर्फ आठ र छात्रातर्फ छ विद्यालयको सहभागिता रहेका छन् । प्रतियोगिताको पहिलो दिन दश खेल सम्पन्न गरिएको छ । छात्रतर्फ छ र छात्रातर्फ चार खेल सम्पन्न भएको खेल संयोजक उज्ज्वल भट्टराइले बताए ।

छात्रतर्फ सत्यवती मावि र निर्मल माविबीच भएको खेलमा सत्यवती, बाराही कलेज र पराशर कलेजबीच भएको खेलमा बाराही, कन्काई एकेडेमी र आदिकवि भानुभक्त क्याम्पसबीच भएको खेलमा आदिकवि, सत्यवती मावि र दमौली कलेजबीच भएको खेलमा सत्यवती, व्यास बोर्डिङ र निर्मल माविबीच भएको खेलमा व्यास बोर्डिङ, व्यास बोर्डिङ र दमौली कलेजबीच भएको खेलमा व्यास बोर्डिङ विजयी भएका छन् ।

छात्रातर्फ पराशर कलेज र दमौली कलेजबीच भएको खेलमा पराशर, सत्यवती मावि र बाराही कलेजबीच भएको खेलमा सत्यवती, बाराही कलेज र व्यास बोर्डिङबीच भएको खेलमा बाराही र व्यास बोर्डिङ र निर्मल माविबीच भएको खेलमा व्यास बोर्डिङ विजयी भएको आयोजकले जनाएको छ । प्रतियोगितामा छात्रतर्फ आठ र छात्रातर्फ छ विद्यालयको सहभागिता रहेको छ । प्रतियोगितामा प्रथम हुने विद्यालयले रनिङशिल्ड ट्रफीबाट पुरस्कृत गरिने भएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर