शुक्लागण्डकीमा असिनापानीका कारण १५ सय कुखुरा मरे

लामो समयपछि परेको हिउँदे वर्षाका कारण तनहुँको शुक्लागण्डकीका केही वडामा ठूलो क्षति पुगेको छ । शुक्लागण्डकीको वडा नं. ८, ९ र १० मा आइतबार हावाहुरी सहित परेको असिनापानीले हिउँदे बालि तथा कुखुरा पालनमा समेत क्षति पुर्‍याएको छ ।

शुक्लागण्डकी-१० स्थित मिनामखानीमा दुलेगौँडाका हरि खड्काले संचालन गरेका युनिक मल्टि एग्रो फार्ममा पालिएको १ हजार ५ सय कुखुरा असिनाले लागेर मरेका छन् । दिउँसो चरणका लागि खुला छाडिएका साना ठुला कुखुरा मरेको खड्काले बताए ।

‘कतिपय कुखुरा असिनामा गडेका छन्’ । उनले भने ‘रातभरीमा अझै कति मर्ने हुन् थाहा छैन । अहिलेसम्म पनि असिना डेढ फिट भन्दा धेरै जमेको अवस्थामा छ ।’ असिनाका कारण १०/१२ लाख बराबरको क्षति पुगेको उनले बताए । हावाहुरी र असिनापानी हृवात्तै आएकाले मान्छे जानै नसक्ने हुँदा धेरै क्षति भएको उनले बताए ।

फर्ममा कुखुरा, हाँस र कालिजका लागि राखिएका जालीमा समेत क्षति पुगेको छ । ‘हावाहुरी र असिनाले जाली कतै च्यातिएको छ भने कतै असिना भरिएको हुँदा झोलिएर बसेको छ उनले बताए । यस्तो प्राकृतिक प्रकोपबाट कृषकलाई परेको क्षतिमा सरकारले हेर्नुपर्ने उनको भनाई छ ।

असिनाले हिउँदे तरकारीबाली पुर्ण रुपमा नष्ट गरेको छ । वडा नं. १० मा मात्र तरकालीबाली र टनेलोमा पुगेको क्षति गरी १५ लाख भन्दा बढिको क्षति भएको वडाध्यक्ष राजेन्द्र भट्टराइ क्षेत्रीले जानकारी दिए ।

सेयर गर्नुहोस्

प्रतिक्रिया दिनुहोस्

सम्बन्धित खवर