भानु नगरपालिकाले स्थापना दिवस मनाउने
भानु : तनहुँको भानु नगरपालिकाले स्थापना दिवस मनाउने भएको छ । २०७२ साल असोज १५ गतेबाट विधिवत स्थापना भएको उपलक्ष्यमा नगरपालिकाले दशौं स्थापना दिवस मनाउने तयारी गरेको छ ।
हरेक वर्षको जस्तै, यस वर्ष पनि विविध कार्यक्रमका साथ स्थापना दिवस मनाउने तयारी गरिएको नगरपालिकाले जनाएको छ । स्थापना दिवसका अवसरमा नगर शिक्षा समितिले विविध कार्यक्रमहरु सञ्चालन गर्ने निर्णय गरेको नगर शिक्षा अधिकारी ध्रुवराज पौडेलले जानकारी गराए ।
नगरपालिकाले असोज १५ गते विहान ७ः०० बजेदेखि १०ः०० बजेसम्म, प्रत्येक विद्यालयले शिक्षक, विद्यार्थी र स्थानीय सामुदायिक सिकाइ केन्द्रका प्रतिनिधिहरूसँग मिलेर विद्यालय प्राङ्गण र सेवाक्षेत्र आसपासको सरसफाई गरी फोहोरको उचित व्यवस्थापन गर्ने भएको छ ।
नगरपालिकाले असोज १५ र १६ गते अन्तर विद्यालय शिक्षक मैत्रीपूर्ण भलिबल प्रतियोगितामा गर्ने र उक्त प्रतियोगितामा शिक्षक उपस्थित हुन नसकेमा विद्यालयमा अतिरिक्त क्रियाकलाप सञ्चालन गरिने भएको छ ।
यस्तै, स्थपना दिवसका अवसरमा असोज १४, १५ र १६ गते साँझ सबैले आफ्ना घर र विद्यालयमा दीपावली गर्न नगर शिक्षा शाखाले आग्रह गरेको छ ।
