एमालेमाथि चौतर्फी आक्रमण छ, त्यसलाई चिरेर अगाडी बढ्छौ : सचिव अर्याल

नेकपा (एमाले) केन्द्रीय सचिव पद्मा अर्यालले अहिले पार्टीमाथि चौतर्फी आक्रमण भइरहेको बताएकी छन् । प्रेस चौतारी नेपाल तनहुँ शाखाको आइतबार आयोजित भेलामा बोल्दै सचिव अर्यालले एमालेमाथि भइरहेको आक्रमण चिर्दै अगाडी बढ्नुको विकल्प नभएको बताइन् ।

एमाले विरुद्ध अहिले महागठबन्धन भइरहेको उल्लेख गर्दै सचिव अर्यालले त्यस्तो महागठबन्धनलाई जनताले जवाफ दिने दावी गरिन् । पूर्वमन्त्री रहेका अर्यालले तनहुँ क्षेत्र नम्बर १ को प्रतिनिधिसभा सदस्य उपनिर्वाचनमा एमाले उम्मेदवारले जित्ने बताइन् । उनले भनिन्, ‘भोलिको राजनीतिक भविष्यका लागि पनि हामीले जित्नैपर्ने छ, सबै कार्यकर्ता एकढिक्का भएर लागे चुनाव जित्न सम्भव छ ।’

प्रेस चौतारी नेपालका केन्द्रीय सचिव सुष्मा पौडेलले एमाले उम्मेदवारका बारेमा प्रेस चौतारीले प्रचारप्रसार गर्नुपर्ने बताइन्। नेकपा (एमाले) केन्द्रीय कमिटी सदस्य भगवती न्यौपानेले पार्टीका राम्रा पक्षका बारेमा जनतामाझ लैजानुपर्ने बताइन् ।

वैशाख १० गते हुने तनहुँ-१ को प्रतिनिधिसभा सदस्य उपनिर्वाचनका लागि एमाले उम्मेदवार सर्वेन्द्र खनाललाई निर्वाचित गराउन एमाले तनहुँले चुनावी प्रचारप्रसार अभियानलाई तीब्र पारेको छ । चुनावी अभियान अन्तर्गत सोमबार देवघाट गाउँपालिका कमिटीले देवघाटमा चुनावी सभा कार्यक्रम गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर