व्यास नगरपालिकाद्वारा ८२२ जना अपाङ्गता व्यक्तिलाई परिचयपत्र वितरण

तनहुँको व्यास नगरपालिकाले ८२२ जना अपाङ्गता भएका व्यक्तिलाई परिचय पत्र वितरण गरेको छ । नगरपालिकाको महिला बालबालिका अपाङ्गता तथा ज्येष्ठ नागरिक उपशाखाले दिएको तथ्याङ्क अनुसार क वर्गकालाई रातो, ख वर्गकालाई निलो, ग वर्गकालाई पहेलों कार्ड र घ वर्गको अपाङ्गता भएका व्यक्तिलाई सेतो परिचय पत्र प्रदान गरिएको हो ।

नगरपालिकाले रातो कार्ड १३५ जनालाई, निलो कार्ड ३३६ जनालाई, पहेंलो कार्ड २३५ जनालाई र सेतो कार्ड ११६ जनालाई वितरण गरेको छ । सरकारबाट प्राप्त रकम नगरपालिकाले ‘क’ र ‘ख’ वर्गलाई मासिक क लाई चार हजार र ‘ख’ वर्गलाई दुइ हजार रुपैयाँका दरले उपलब्ध गराउँदै आएको छ ।

सरकारले रातो र नीलो कार्ड प्राप्त व्यक्तिलाई मात्र प्रोत्साहन रकम दिने गरेको भएपनि ‘ग’ वर्गलाई भने सुविधा प्रदान गरेको छैन । संघीय सरकारले रातो कार्ड भएका व्यक्तिलाई मासिक ४ हजार र निलो कार्ड भएकालाई २ हजार १२८ रुपैया भत्ता प्रदान गर्दै आएको छ ।

नगरपालिकाको तर्फबाट प्रोत्साहनस्वरूप पहेंलो कार्ड भएका व्यक्तिलाई वार्षिक ४ हजार रुपैयाँ भत्ता दिंदै आएको उपप्रमुख इन्द्रिरा दरैले बताइन् । उनले भनिन्, ‘सरकारले रातो र नीलो कार्ड प्राप्त व्यक्तिलाई मात्र प्रोत्साहन रकम दिने गरेको छ तर व्यास नगरपालिकाले पहेंलो कार्ड भएकालाई पनि रकम प्रदान गरेको छ ।’

सामाजिक सुरक्षा भत्ता र पेन्सन पाउनेहरुलाई भने प्रोत्साहन रकम दिईने गरिएको छैन । सेतो कार्ड पाएका अपाङ्गता भएका व्यक्तिको शारीरिक अवस्था सामान्य रहने हुँदा काम गरी खान सक्ने भएकाले भत्ता बितरण नगरिएको बताइएको छ । सबै प्रकारका अपाङ्गता भएका व्यक्तिले राज्यले प्रदान गर्ने स्वास्थ्य, शिक्षा र रोजगारीमा छुटको व्यवस्था हुन्छ भने लोकसेवामा लड्न पाउने व्यवस्था गरिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर