लमजुङमा भोज खाएका १ महिलाको मृत्यु, ३९ जना बिरामी

लमजुङको सुन्दरबजार नगरपालिका ८, डुडकुलामा क्रिसमसको क्यारल भोज (सामुहिक भोज) खाएर बिरामी भएकामध्ये १ जना महिलाको मृत्यु भएको छ । भोज खाएकामध्ये ३८ जना बिरामीको सुन्दरबजारस्थित एडचडीसीएस-नमुना अस्पतालमा उपचार भइरहेको छ । एकजना विरामी बेंसीशहरस्थित लमजुङ अस्पतालमा उपचारका लागि आएकोमा उनलाई रिफर गरी पुरानो मेडिकल कलेज पठाइएको छ ।

अस्पतालका अनुसार भोज खाएपछि सिकिस्त विरामी परेका बेंसीसहर नगरपालिका ४, पुरानकोट घर भइ हाल सुन्दरबजार नगरपालिका ९, भोटेओडार बस्दै आएकी ३२ वर्षीया देवी परियारको मृत्यु भएको हो । अस्पताल प्रमुख हेमन्त श्रेष्ठका अनुसार आइतबार बिहानीपख ४-५ बजेतिर बेहोस् भएपछि ती महिलालाई अस्पताल ल्याएको र अस्पताल ल्याउनेवित्तिकै डाक्टरहरुले मृत घोषणा गरेका थिए । उहाँका अनुसार भोज खाएपछि बिरामी भएका ३८ जनाको एचडीसीएस-नमुना अस्पतालमा भर्ना गरी उपचार भइरहेको छ । बिरामी परेकामा एकै घरकाहरु समेत छन् । बिरामीमध्ये १० जना पुरुष र २८ जना महिला छन् । यसमा १५ वर्ष मुनिका ३ जना बालिका र ८ जना बालक छन् ।

सुन्दरबजार नगरपालिका ८, डुढकुलाका क्षेत्रबहादुर गुरुङ घरमा शुक्रबार साँझ अनन्त सालोम चर्चमा आवद्ध सुन्दरबजार नगरपालिका ८ र ९ बस्दै आएका स्थानीय क्रिसमसको अवसरमा क्यारल भोज (सामुहिक भोज) खाएका थिए । त्यसपछि घर गएका उनीहरुमा पखाला लाग्ने, बान्ता हुने, पेट दुख्ने, शरीर कमजोर भइ काम्ने जस्तो लक्षण देखिएको थियो । उपचार र औषधी नखाई घरमै बसिरहेका उनीहरुमध्ये देवी गम्भीर भएपछि अस्पताल लगिएकोमा उहाँको मृत्यु भएको थियो ।

उनीहरुले कालो दाल, भात, कुखुराको मासु, मुलाको अचार, गाउँघरको धाराको पानी खाएको बताएका छन् । करिब ४० जनाले भोज खाएको उनीहरुले बताएका छन् । जिल्ला प्रहरी कार्यालयका प्रहरी निरीक्षक एवं सूचना अधिकारी थानेश्वर चपाइले भोज खाएर बिरामी परेकामध्ये १ महिलाको मृत्यु भएको र अन्यको उपचार भइरहेको बताउनुभयो ।

सेयर गर्नुहोस्

प्रतिक्रिया दिनुहोस्

सम्बन्धित खवर