संस्थागत क्षमता स्व-मूल्याङ्कनमा तनहुँको म्याग्दे प्रदेशमा पहिलो
भञ्ज्याङ समाचारदाता/म्याग्दे
तनहुँको म्याग्दे गाउँपालिका संस्थागत क्षमता स्व-मूल्याङ्कनमा गण्डकी प्रदेशमा पहिलो हुन सफल भएको छ । आर्थिक वर्ष २०७९/०८० को नतिजा अनुसार म्याग्दे गाउँपालिका प्रदेशमा नै ९४.५ अंक प्राप्त गरी पहिलो बन्न सफल भएको हो ।
स्थानीय तहको कार्य प्रक्रिया र उपलब्धिहरुको बारेमा लेखाजोखा गरी सवल र दुर्बल पक्षको पहिचान गर्न, विकास तथा सुशासनमा रहेका कमी कमजोरीहरुको जानकारी लिन, आवधिक समिक्षाको आधार प्राप्त गर्न र गाउँपालिका र नगरपालिकाहरु बीचमा तुलनायोग्य सुचकहरु तर्जुमा गरी प्रतिस्पर्धात्मक सुधारमा अग्रसर गराउनका लागि स्थानीय तह संस्थागत क्षमता स्व-मूल्याङ्कन कार्यविधि २०७७ अनुसार स्व-मूल्याङकन गरी नतिजा सार्वजनिक गरिएको छ ।
गाउँपालिकाको आर्थिक वर्ष २०७९/०८० को संस्थागत क्षमता स्व-मूल्याङ्कनको नतिजा सोमबार बसेको कार्यपालिकाको बैठकले अनुमोदन गरी सार्वजनिक गरिएको गाउँपालिकाका प्रमुख प्रशासकीय अधिकृत नारायण अधिकारीले जानकारी गराए ।
गाउँपालिकाले लिजाको नियम अनुसार विभिन्न १० वटा शिर्षकमा स्व-मूल्याङ्कन हुनेछ । जसमा म्याग्दे गाउँपालिकाले शासकीय प्रवन्धमा ९ अंकभारमा ९ अंक नै प्राप्त गरेको छ भने संगठन तथा प्रशासनमा ८ अंकभारमा ८ अंक, वार्षिक बजेट तथा योजना व्यवस्थापनमा ११ अंकभारमा ११ अंक, वित्तीय तथा आर्थिक व्यवस्थापनमा ११ अंकभारमा ११ अंक, सेवा प्रवाहमा १६ अंकभारमा १५ अंक, न्यायीक कार्य सम्पादनमा ७ अंकभारमा ६.५ अंक, भौतिक पुर्वाधारमा १३ अंकमा ११.५ अंक, सामाजिक समावेशीकरणमा १० अंकभारमा ९.५, वातावरण संरक्षण तथा विपद व्यवस्थापनमा ९ अंकभारमा ८.२५ र सहकार्य र समन्वयमा ६ अंधारमा ४.७५ अंक प्राप्त गरी कुल १०० अंकभारमा ९४.५ प्राप्त गरेको छ ।
गाउँपालिकाले शासकीय प्रवन्ध, संगठन तथा प्रशासन र वार्षिक वजेट तथा योजना व्यवस्थापनमा शतप्रतिशत नतिजा निकालेको छ । लिजामा प्रकाशित नतिजा अनुसार गाउँपालिकाले समग्र स्थितिमा ९७.६२ प्रतिशत, प्रक्रियागत स्थितीमा ९५.५९ प्रतिशत र परिमाणात्मक स्थितीमा ९२.२२ प्रतिशत नतिजा प्राप्त गरेको छ ।
गण्डकी प्रदेश भरिका ८५ वटा पालिका मध्ये ८२ वटा पालिकाको नतिजामा म्याग्दे गाउँपालिका प्रदेशको नै पहिलो पालिका बनेको छ भने स्याङजाको अर्जुनचौपारी दोश्रोमा र तनहुँको आँवुखैरेनी गाउँपालिकाले तेश्रो स्थानमा रहेको छ ।
