बन्दीपुरमा मनाइयो शहीद दिवस

तनहुँको बन्दीपुरमा शहीद दिवस मनाइएको छ । प्रजातन्त्र स्थापना एवं पुनःस्थापना तथा विभिन्न कालखण्डका स्वतन्त्रताका लागि जीवन आहुति दिने शहीदको सम्झनामा बन्दीपुरमा शहीद दिवस मनाइएको हो । बन्दीपुरको शहीद स्मारक बाटिकामा स्थापना गरिएको शालिकमा पुष्पगुच्छा तथा माल्यार्पण तथा स्मृति सभा गरिएको थियो ।

गाउँपालिका अध्यक्ष सुरेन्द्र बहादुर थापा, प्रमुख प्रशासकीय अधिकृत नवेशराज हमाल, गाउँपालिका वडाध्यक्ष सहितका जनप्रतिनिधि बिभिन्न राजनीतिक दल, संघ संस्थाका प्रमुख एवं प्रतिनिधि स्थानीयको सहभागितामा शहीको स्मरण गरिएको थियो ।

स्वतन्त्रताको माग गर्दा विसं १९९७ मा सहिद शुक्रराज शास्त्रीलाई माघ १० गते काठमाडौँको टेकुस्थित पचलीमा, माघ १३ गते धर्मभक्त माथेमालाई सिफलमा र गङ्गालाल श्रेष्ठ एवं दशरथ चन्दलाई माघ १५ गते शोभाभगवतीमा राणा शासकले मृत्युदण्ड दिएका थिए । यस्तै राणा शासनविरुद्ध आन्दोलन चर्किरहेको बेला बन्दीपुरमा आन्दोलन हुँदा ६ जनाको त्यही मृत्यु भएको थियो ।

ज्यान गुमाउनेमा पुलिमराङका धर्मध्वज गुरुङ, तनहुँसुरका उत्तरकुमार श्रेष्ठ, सिम्पानीका चन्द्रबहादुर सार्की, वसन्तपुरका खड्गबहादुर गोदार, तनहुँसुरका सन्तबहादुर राना मगर र धर्मराज बतासलाई हत्या गरी बन्दीपुरको भीरबाट खसालिदिएको थियो । पछि सो ठाउँमा समाधी स्थल बनाइयो । समाधी स्थलसंगै शहीद स्मारक बाटिका बनाइएको छ ।

वि.सं. २०४९ कात्तिक १ गते निर्माण शुरू गरिएको सो बाटिकाको तत्कालिन प्रधानमन्त्री गिरिजाप्रसाद कोइरालाले सो वि.सं. २०५६ मंसिर २५ मा उद्घाटन गरेका थिए । स्थापना कालदेखि नै सो बाटिकामा हरेक वर्षशहीद दिवसमा शहीदहरूको सम्झना कार्यक्रम गरिँदै आइएको छ । बन्दीपुर घुम्न आउनेहरुका लागि शहीद पार्क पनि गन्तव्य बन्ने गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर