तनहुँको म्याग्दे गाउँपालिकाले कोभिड अस्पतालमा चिकित्सक नियुक्त गर्ने, सात वटै वडामा आइसोलेशन स्थापनाको तयारी

तनहुँको म्याग्दे गाउँपालिकाले जामुनेस्थित कोभिड अस्पतालमा चिकित्सक नियुक्ति गर्ने भएको छ । गाउँपालिकाको शनिबार सम्पन्न ११०औ कार्यपालिकाको बैठकले जामुने कोभिड अस्पतालका लागि तत्काल एक जना चिकित्सक नियुक्ति गर्ने निर्णय गरेको हो ।

कोभिड संक्रमण बढ्दै गएपछि अस्पताल सञ्चालनका लागि गाउँपालिकाले चिकित्सक परिचालन गर्न लागेको प्रमुख प्रशासकीय अधिकृत नारायणप्रसाद अधिकारीले जानकारी दिए । तत्कालको आवश्यकतालाई ध्यानमा राखेर तीन दिनभित्र दुइ महिनाको लागि चिकित्सक करारमा नियुक्ति गर्ने निर्णय भएको उनले बताए ।

कोभिड अस्पतालमा हाल पाँच शैय्या रहेको र यसलाई बढाएर दश शैय्या बनाउने तयारी गरिएको छ । कोभिड अस्पतालका लागि अक्सिजनको व्यवस्थापन भइसकेको र थप अक्सिजन जुटाउने प्रयास गरिएको गाउँपालिकाले जनाएको छ ।

कोभिड अस्पतालमा गाउँपालिकाले केही महिना पहिला चिकित्सक नियुक्ति गरेपनि उक्त चिकित्सकले छोडिदिएपछि अस्पताल चिकित्सक विहीन छ । गाउँपालिकाले कोभिड अस्पतालमा प्रयोगशाला समेत शुभारम्भ गरेको थियो । गाउँपालिकाले घरमा बस्न नमिल्नेका लागि सात वटै वडामा आइसोलेशन स्थापना गर्ने निर्णय गरेको छ । आइसोलेशन केन्द्रमा बत्ती र पानीको व्यवस्थापन गाउँपालिकाले गर्नेछ भने बाँकी स्वयं व्यक्तिमार्फत नै गराउने निर्णय भएको छ ।

वडा नं. १ स्थित महेन्द्र मावि गुणादी, कुल ज्योति आवि बाख्रे, विजय आधारभूत विद्यालय मानुङ, थानीदेवी प्रावि बर्च्याङमा आइसोलेशन बनाइनेछ । वडा नं. २ स्थित उमादेवी प्रावि, ऋषिथुम आवि, राधा मावि, वडा नं. ३ स्थित जनगणपति मावि, रविचन्द्र प्रावि, वडा नं ४ स्थित मिन मावि, गणेश मावि, जनप्रकाश आवि, वडा नं ५ स्थित जनशक्ति प्रावि, हिरामणि प्रावि, पञ्चकन्या प्रावि, बोटेनी सामुदायिक भवन, वडा नं ६ स्थित अकला आवि, अकला सामुदायिक सिकाइ केन्द्र र वडा नं ७ स्थित मिलीजुली प्रावि, सरस्वती आवि, देवी दलित सामुदायिक भवनमा आइसोलेशन केन्द्र बनाउने गाउँपालिकाले तयारी गरेको छ ।

गाउँपालिकाकी अध्यक्ष मायादेवी रानाको अध्यक्षतामा बसेको बैठकले कोरोना जोखिम बढेपछि गाउँपालिकाले पिसिआर परीक्षणको दायरा थप वृद्धि गर्ने निर्णय गरेको छ । निषेधाज्ञाको पालना गर्दै घरमै बस्न गाउँपालिकावासीलाई अध्यक्ष रानाले आग्रह गरेकी छन् । यस्तै, निषेधाज्ञाको अवधिमा गाउँपालिकाले नागरिकको आवश्यकता र माग अनुसार हप्तामा तीन दिन दैनिक तीन घण्टामात्रै कार्यालय खोल्ने निर्णय गरेको छ । सीमित कर्मचारी आलोपालो गरी स्वास्थ्यको मापदण्ड पूर्ण पालना गराइ सरकारी कारोवारको भुक्तानी तथा नागरिकको संकलित निक्षेप रकम माग अनुसार भुक्तानी गर्ने निर्णय गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर