तनहुँको भानु नगरपालिकामा सञ्चालित मासु पसलको अनुगमन
भानु : तनहुँको भानु नगरपालिकाले मासु पसल अनुगमन गरेको छ । चाडपर्व नजिकिएसँगै चाडपर्व लक्षित मासु पसलको अनुगमन गरिएको हो । पशुपंछी तथा मत्स्य विकास शाखाका पशु सेवा प्राविधिक अमित ढुंगानाका अनुसार चाडपर्व लक्षित बजार अनुगमनको पहिलो चरणमा मासु पसलहरूमा अनुगमन गरिएको हो ।
उपभोक्ता सचेतनाको अभावका कारण गुणस्तरमा बजारको असन्तुलन देखिएकोले पशुपंछी तथा मत्स्य विकास शाखाका प्रमुख सुशील ऐरीको नेतृत्वमा चन्द्रावती, टुहरेपसल, सेपाबगैचा, बाईसजागर, कालीमाटी लगायत स्थानमा सञ्चालित मासु पसलहरुमा अनुगमन गरिएको थियो ।
अनुगमनका क्रममा कतिपय पसलहरू दर्ता विनै सञ्चालनमा रहेका, मूल्य सूचि नभएको, सरसफाइ नभएको, खसिबोका, बाख्रा र कुखुराको मासु एकै ठाउँ फ्रिजिङ गरिएको लगायतका त्रुटीहरु पाइएको छ ।
नगरपालिका क्षेत्रमा सञ्चालित मासु पसलको बुधबार गरिएको अनुगमनका क्रममा ८० प्रतिशत मासु पसल नियम विपरित सञ्चालन गरेको पाइएको छ ।
पसलको साईन बोर्डसमेत नराखी खुला रुपमा मासु बेचेको, मासु फोहोर भएको, मूल्यसूची नराखिएको, कामदारले माक्स र एप्रोनको प्रयोग नगरेको, जालीको व्यवस्था नगरेको पाइएपछि टोलीले व्यवस्थित गर्न निर्देशन दिएको छ ।
नगरपालिकाले चन्द्रावतीदेखि कालीमाटी सम्मका २५ पसलमा अनुगमन गरिएकामा १९ वटा बिना दर्ता सञ्चालन भएको पाइएको पशु सेवा प्राबिधिक अमित ढुंगानाले बताए ।
