तनहुँका माध्यमिक तहका प्रधानाध्यापकहरु बीच शैक्षिक गुणस्तर अभिवृद्धिका विषयमा अन्तरक्रिया

भानु : माध्यमिक तहका प्रधानाध्यापकहरु बीच शैक्षिक अन्तरक्रिया कार्यक्रम गरिएको छ। शिक्षा विकास तथा समन्वय इकाई तनहुँले जिल्लाका सामुदायिक र संस्थागत माध्यमिक विद्यालयका प्रधानाध्यापकहरु बीच शैक्षिक गुणस्तर अभिवृद्धिका लागि उक्त अन्तरक्रिया कार्यक्रम गरेको हो ।

अन्तरक्रिया कार्यक्रमको शुभारम्भ गर्दै जिल्ला समन्वय समितिका प्रमुख शान्तिरमण वाग्लेले शैक्षिक गुणस्तर अभिवृद्धिका लागि विद्यालयहरु बीच पनि समन्वय र सहकार्य गरी अगाडि बढ्न सुझाएका थिए। उनले अब्बल मानिएका विद्यालयहरुले अन्य विद्यालयहरुको शैक्षिक गुणस्तर वृद्धि गर्न तथा बदलिदा परिवेश अनुसार व्यवसायिक र सीपमुलक शिक्षा प्रदान गर्न लाग्न जोड् दिए ।

शिक्षा विकास तथा समन्वय इकाई तनहुँका प्रमुख उद्धवराज कट्टेलको अध्यक्षतामा आयोजित अन्तरक्रिया कार्यक्रममा तनहुँ जिल्लाका विभिन्न स्थानका सामुदायिक र संस्थागत माध्यमिक विद्यालयका ८० जना प्रधानाध्यापकहरूको सहभागिता रहेको थियो ।

कार्यक्रमको प्रारम्भमा इकाई प्रमुख कट्टेलले शैक्षिक गुणस्तर अभिवृद्धिका लागि विद्यालयले सञ्चालन गर्नुपर्ने कार्यक्रमहरूको बारेमा छलफल प्रस्तुत गरेका थिए। उनले केन्द्रका नीति नियम, आईइयमआइयस, कासमू फाराम, रिएर प्लान र एसईई परीक्षा परीक्षा २०८० का नतिजाका तथ्याङ्क सम्बन्धी विषयमा सहजिकरण गरेका थिए ।

कार्यक्रममा सहभागि प्रधानाध्यापकहरूलाई १० वटा समुहमा विभाजन गरी आ–आफ्नो विद्यालयमा भएका असल अभ्यासहरूका विषयमा छलफल गर्नुका सार्थ समूहगत रूपमा ती अभ्यासहरूको प्रस्तुतीकरण गरिएको थियो । यस प्रकारको कार्यक्रमले एक अर्काबाट सिक्न र शैक्षिक क्षेत्रको सुधारका उपायहरूमा थप विचार गर्न उत्प्रेरित गरेको सहभागि प्रधानाध्यपाकहरुले प्रतिक्रिया दिएका थिए ।

उक्त कार्यक्रममा भानु नगरपालिकाका शिक्षा अधिकारी ध्रुवराज पौडेलले शैक्षिक उन्नयनका लागि भानु नगरपालिकाले गरेका सकारात्मक अभ्यासहरूका विषयमा सहजिकरण गरेका थिए । शिविसईका शाखा अधिकृत विश्वप्रकाश रेग्मीले एसईई परीक्षामा विद्यार्थीहरूले रजिष्ट्रेशन र परीक्षा आवेदन फाराम भर्दा हुनसक्ने त्रुटीहरू र तिनीहरूबाट बच्नका लागि अपनाउनु पर्ने सावधानिहरूका विषयमा जानकारी गराएका थिए ।

कार्यक्रममा नेपाल शिक्षक महासंघ तनहुँका अध्यक्ष रामचन्द्र पोखरेल, नेपाल राष्ट्रिय शिक्षक संगठन तनहुँका अध्यक्ष रघुनाथ पण्डित र एन प्याब्सनका केन्द्रीय उपाध्यक्ष तिलक बहादुर चौहान लगायतले आ–आफ्ना विचार व्यक्त गरेका थिए ।