जिल्ला प्रशासन कार्यालय तनहुँद्वारा चालु आवको कार्यप्रगति सार्वजनिक

दमौली : जिल्ला प्रशासन कार्यालय तनहुँले चालु आर्थिक वर्षको हालसम्म सम्पादन गरेका कार्यप्रगित सार्वजनिक गरेको छ । कार्यालयले विहीबार पत्रकार अन्तरक्रिया कर्याक्रम गरी चालु आर्थिक वर्षमा नागरिकता वितरण, राहदानी आवेदन, वैदेशिक रोजगार परामर्श, विपद् व्यवस्थापन, बजार अनुगमन, उपभोक्ता सचेतना र विभिन्न सेवा प्रवाहका विषयमा भए गरेको विवरण सार्वजनिक गरेको हो ।

सहायक प्रमुख जिल्ला अधिकारी जितबहादुर भण्डारीले साउनदेखि चैत महिनासम्म जिल्लामा प्रदान गरिएका सेवाहरूको सम्पूर्ण विवरण सार्वजनिक गरे । नागरिकता वितरणतर्फ १३ हजार ५४ रहेकोमा यसमध्ये नयाँ नागरिकता ५ हजार ७८२, प्रतिलिपि नागरिकता ७ हजार २४०, वैवाहिक अंगिकृत ८, र गैरआवसीय नागरिकता २४ रहेको उनले जानकारी गराए ।

यस्तै, राहदानी आवेदन ९ हजार १४३ दर्ता भएको छ भने ४४८ नाबालक परिचयपत्र वितरण गरिएको छ । वैदेशिक रोजगारीका लागि १० हजार २६ जनाले परामर्श सेवा लिएको सहायक प्रजिअ भण्डारीले जानकारी गराए ।

उनका अनुसार वैदेशिक रोजगारीका क्रममा ठगिमा परेका २४ जनाको ५४ लाख २ हजार रकम फिर्ता गराइएको र दुर्घटनामा परेकाहरुलाई ४ करोड २१ लाख १९ हजार २५६ रुपैयाँ सहजीकरण गरिएको छ ।

गुनासो व्यवस्थापनतर्फ कार्यालयले सञ्चालनमा ल्याएको क्यूआर कोड प्रणालीमार्फत प्राप्त उजुरीहरूको फस्र्योट अन्तर्गत कार्यालयले १०४ उजुरीमध्ये २४ वटा सफलतापूर्वक समाधान गरेको र बाँकी ८० उजुरी वैदेशिक रोजगार विभागमा पठाइएको उनले जानकारी गराए ।

यस्तै, बजार अनुगमनमा जिल्लाभरका विभिन्न व्यवसाय, होटल, उद्योग र पसलहरूको अनुगमन गरिएको थियो । उपभोक्ता हित विपरीत कार्य गर्ने ७ वटा फर्मलाई कारबाही गरी ३५ हजार रुपैयाँ जरिवाना गराइएको थियो। यसका साथै, बजार अनुगमनका क्रममा विभिन्न अखाद्य वस्तुहरू पनि जफत गरिएको सहायक प्रजिअ भण्डारीले जानकारी गराए ।

जिल्लाका ८५ वडामा नागरिकताको अनलाइन सिफारिस सेवा सञ्चालनमा ल्याइएको जानकारी गराउँदै उनले संचारकर्मीहरूलाई सेवाको प्रभावकारिता अभिवृद्धि गर्नका लागि निरन्तर सुझाव दिन आग्रह गरे ।

यस्तै, हालै मात्र सरुवा भइ आएका प्रमुख जिल्ला अधिकारी रामकृष्ण अधिकारीले पेशागत व्यावसायिकतालाई ध्यानमा राखेर काम गर्ने बताएका छन् । बिहीबार कार्यालयमा सञ्चारकर्मीसँग भेटघाट गर्दै प्रजिअ अधिकारीले सहकार्यबाट उपलब्धिमूलक काम हुने भएकाले सबैसँग सहकार्य गरेर काम गर्ने प्रतिबद्धता जनाए ।

राज्य सञ्चालन गर्ने राजनीतिक दलले भएको बताउँदै उनले राजनीतिक दलका सबै नेताहरुप्रति श्रद्धा र सम्मान भएको बताए । काम गर्ने सिलसिलामा प्रचलित कानुनले तोकेका कामहरु गर्ने बताउँदै उनले शान्तिसुरक्षा कायम, अपराध न्यूनीकरण पहिलो प्राथमिकता रहेको उल्लेख गरे ।

अधिकारीले सेवा प्रवाहलाई सरल र सहज बनाउने बताउँदै विपद् व्यवस्थापन, सवारी दुर्घटना न्यूनीकरण, लागुऔषध दुव्र्यसन न्यूनीकरणका लागि सबै पक्षसँग मिलेर काम गर्ने प्रतिबद्धता जनाए ।