लमजुङको राइनासमा आफ्नै साथीको हत्या
लमजुङ : लमजुङको राइनास नगरपालिका-४, सातबिसेमा एक युवकले आफ्नै साथीको हत्या गरेको खुलेको छ । निर्माणाधीन राइनास नगर अस्पतालका सुरक्षा गार्ड अन्दाजी २२ वर्षीय विशाल दाहालको आफ्नै साथीबाट हत्या भएको प्रारम्भिक अनुसन्धानबाट खुलेको प्रहरीले जनाएको छ ।
जिल्ला प्रहरी प्रमुख डीएसपी रेशम बोहराका अनुसार दाहाल आफैं सुत्ने कोठामा आइतबार मृत भेटिएपछि प्रहरी चौकी तिनपिप्लेबाट प्रहरी निरीक्षक राजाराम खतिवडाको कमाण्डमा अनुसन्धान टोली खटिएको थियो । उनका अनुसार प्रारम्भिक अनुसन्धानका क्रममा सिन्धुलीको कमलामाई नगरपालिका-१० घर भएका दाहालको टाउकामा पछाडि चोट देखिएको र घोप्टो अवस्थामा रहेको, ढोका बन्द र झ्याल खुला अवस्थामा रहेको देखिएपछि गण्डकी प्रदेश प्रहरी कार्यालयमार्फत तालिमप्राप्त कुकुर ल्याएर अनुसन्धान गरिएको थियो ।
प्रारम्भिक अनुसन्धानका क्रममा दाहालसँगै हिँडडुल गरिरहने राइनास -३ का ३० वर्षीय सागर परियारको ढुंगा प्रहारबाट दाहालको मृत्यु भएको खुल्न आएको डीएसपी बोहराले बताए । उनका अनुसार खोजतलासका क्रममा परियारलाई साथीसँगै बस्दै गरेको अवस्थामा सोमबार बिहान ४ बजेतिर बेंसीसहरबाट पक्राउ गरिएको छ ।
डीएसपी बोहराका अनुसार घटनाका दिन शनिबार बेलुकी छिमेकीको पसलमा रक्सी सेवन गरेर साथमा रक्सी र मासु लिएर दाहलको कोठामा गएको र दुवैजनाले विहानपख ३–४ बजेसम्म रक्सी खाँदै गर्दा विवाद बढेको खुलेको छ । विवादका क्रममा परियारले दाहाललाई ढुंगा प्रहार गरेको सोधपुछका क्रममा परियारले भनेका छन् । ‘पक्राउपछि सोधपुछका क्रममा दुवैजना बसेर रक्सी खाँदै गरेको र आपसमा विवाद हुँदा नजिकै रहेको ढुंगा प्रहारबाट दाहालको मृत्यु भएको परियारले स्वीकारेका छन्,’ डीएसपी बोहराले भने ।
