भिमाद नगर अस्पतालको तेस्रोपटक म्याद थप
भिमाद : तनहुँको भिमाद नगरपालिका–६ स्थित भिमाद नगर अस्पताल निर्माणका लागि तेस्रोपटक म्याद थप गरिएको छ । संघ सरकारको प्रत्येक पालिकामा नगरस्तरीय अस्पताल बनाउने उद्देश्यबमोजिम २०७८ साल असार २५ गते अस्पताल भवन निर्माणका लागि सम्झौता भएको थियो ।
निर्धारित मितिमा काम हुन नसकेपछि तेस्रोपटकका लागि २०८३ साल जेठ ३० गतेसम्म म्याद थप गरिएको भिमाद नगरपालिकाका प्रमुख दधिराज सुवेदीले जानकारी दिए । अस्पताल भवन निर्माणमा ढिलाइ भएपछि नगरपालिकाले पटकपटक ताकेता गरेको उनको भनाइ छ । तेस्रोपटक म्याद थप हुँदासम्म हालसम्म एक चौथाइमात्र प्रगति भएको छ । रु ११ करोड ८६ लाख ६७ हजारको लागतमा नगरस्तरीय अस्पताल भवन निर्माण गर्न लागिएको सुवेदीको भनाइ छ ।
भिमाद प्राथमिक स्वास्थ्य केन्द्रलाई नगरस्तरीय अस्पतालका रूपमा स्तरोन्नति गरी १५ शय्याको अस्पताल बनाउने काम सुरु भए पनि विगतमा बजेट अभावका कारण काम रोकिएको थियो । भवन निर्माणका लागि नेपाल सरकार र राजेन्द्र दिवस ज्येवाडण्डा जेभी कन्ट्रक्सनबीच २०७८ साल असार २५ गते ठेक्का सम्झौता भएको थियो । सम्झौताको १७ महिना २०७९ साल माघभित्र निर्माण सम्पन्न गर्नुपर्ने म्याद रहेको थियो। यसअघि भवन निर्माणको म्याद २०८१ साल असोज २४ गतेसम्मका लागि म्याद थप भएको थियो ।
अस्पताल भवन चारतलाको निर्माण गरिनेछ । भवन निर्माण भएपश्चात विशेषज्ञ चिकित्सक सहितको सेवा प्रवाह गर्ने लक्ष्य राखिएको छ । भवन बनेपछि शल्यक्रिया कक्ष, बर्थिङ सेन्टर, प्रयोगशाला, एक्सरे, भिडियो एक्सरे, दन्त सेवा र नेत्र सेवा सञ्चालन गर्न छुट्टाछुटै कोठाको प्रयोग गरिने नगरपालिकाले जनाएको छ ।
हाल भिमाद प्राथमिक स्वास्थ्य केन्द्रमा एक मेडिकल अधिकृत, एक स्टाफ नर्स, एक एचए, तीन अहेव, तीन अनमी, एक ल्याब सहयोगी र एक जना कार्यालय सहयोगीको जनशक्ति छ । नगरपालिकाले आन्तरिक स्रोतबाट अस्पतालमा चार जना स्वास्थ्यकर्मीको व्यवस्था गरेको छ ।
