बन्दीपुरको पवित्र माविमा विद्यालय व्यवस्थापन समिति चयन
डुम्रे : तनहुँको बन्दीपुर गाउँपालिका–१ स्थित पवित्रा माध्यमिक विद्यालयमा नयाँ विद्यालय व्यवस्थापन समिति सर्वसम्मतरूपमा चयन गरिएको छ । विद्यालयमा आइतबार बसेको अभिभावक तथा सरोकारवालाको भेलाले डिल बहादुर राना (विजय)लाई नयाँ अध्यक्षमा सर्वसम्मत रूपमा निर्वाचित गरेको हो ।
नवनिर्वाचित विद्यालय व्यवस्थापन समितिको सदस्यहरुमा निलकण्ठ मिश्र, शुक्रकुमार श्रेष्ठ, कृष्ण सिंह ठकुरी, तुलसी गान्धारी, सञ्जु शर्मा सर्वसम्मत निर्वाचित भएका छन् ।
भेलाले विद्यालयको समग्र शैक्षिक गुणस्तर वृद्धि, विद्यार्थी–केन्द्रित कार्यक्रम, अध्ययन वातावरण सुदृढीकरण तथा पूर्वाधार विस्तारसम्बन्धी विषयमा विस्तृत छलफल पनि गरेको थियो ।
नवनिर्वाचित अध्यक्ष र समितिले आगामी कार्यकालमा विद्यालयलाई शैक्षिक उत्कृष्टता, पारदर्शी व्यवस्थापन, सामुदायिक सहभागिता र परिणाममुखी गतिविधितर्फ उन्मुख गराउने प्रतिबद्धता व्यक्त गरेका छन् । विद्यालय सुधारका दीर्घकालीन योजना, स्रोत व्यवस्थापन तथा सिकाइ–सुशासन प्रवर्द्धनलाई प्राथमिकतामा राख्न वडा नं. १ का अध्यक्ष शिवकुमार श्रेष्ठले सुझाव दिएका छन् ।
स्थानीय अभिभावक, समुदायका प्रतिनिधि तथा सरोकारवालाले नयाँ नेतृत्वबाट विद्यालय अझ बढी व्यवस्थित, जिम्मेवार र प्रगतिशील बन्ने उच्च अपेक्षा व्यक्त गरेका छन् ।
