स्वास्थ्य चौकीमा एमबीबीएस डाक्टर सहितको स्वास्थ्य सेवा

• भञ्ज्याङ समाचारदाता (म्याग्दे)

तनहुँको म्याग्दे गाउँपालिकाको स्वास्थ्य चौकी एवं कोभिड अस्पताल प्रयोगशाला सञ्चालनमा ल्याइएको छ । अस्पतालको प्रयोगशाला शुभारम्भ गर्दै गाउँपालिकाकी अध्यक्ष मायादेवी रानाले एमबिबिएस डाक्टर सहितको सेवा स्वास्थ्य चौकीमा सुरु भएको जानकारी गराएकी थिइन् ।

सामान्य उपचार सेवा पनि सहज रुपमा उपभोग गर्न समस्या झेल्दै आएका यस क्षेत्रका बासिन्दालाई अब गाउँमै सुविधायुक्त सेवा शुरु भएको र प्रेसर, सुगरजस्ता रोगको परीक्षणका लागि अन्यत्रा जान नपर्ने उनले बताइन् ।

कार्यक्रममा गाउँपालिकाका उपाध्यक्ष बालकृष्ण घिमिरेले यो हिजोको जस्तो स्वास्थ्य चौकी नभएको बताउँदै गाउँपालिकाले अस्पताल सरहको सेवा स्वास्थ्य चौकिबाटै दिएको दाबी गरे । स्वास्थ्य चौकीलाई थप सेवा सुविधा विस्तार गर्दै लग्ने गाउँपालिकाले लक्ष्य लिएको उनले बताए।

कार्यक्रममा प्रमुख प्रशासकीय अधिकृत नारायण प्रसाद अधिकारीले गाउँपालिकाले स्वास्थ्य क्षेत्रलाई उच्च प्राथमिकतामा राखेको बताए । स्वास्थ्य शाखा प्रमुख तिलक घिमिरेले स्वास्थ्य चौकीबाट दिइने सेवाका बारेमा जानकारी गराउँदै अब डाक्टर स्तरको बिरामी जाँच सेवा, दैनिक सेवा, प्रयोगशाला, सुरक्षित मातृत्व लगायतका सेवा स्वास्थ्य चौकीबाटै उपलब्ध गराइने बताए ।

म्याग्दे गाउँपालिका-२ का अध्यक्ष चन्द्रबहादुर रानाभाटको अध्यक्षतामा आयोजित कार्यक्रममा स्वास्थ्य चौकीका डाक्टर प्रदिप थापा तथा स्वास्थ्य चौकी इन्चार्ज सक्षम घिमिरेले सर्वसाधारणलाई सहज रुपमा उपचार सेवा प्रदान गर्न आफुहरु लागि पर्ने बताएका थिए । स्वास्थ्य चौकीमा एक डाक्टर, दुइ स्टाफ नर्स, एक हेल्थ असिस्टेन्ट, दुइ जना अहेब, एक ल्याव असिस्टेन्ट, तीन अनमीसहितका जनशक्ति कार्यरत रहेको गाउँपालिकाले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर