पर्यटन पूर्वाधार अन्तरगत तनहुँका दुइ वटा योजनालाई ७/७ करोड बिनियोजन

• भञ्ज्याङ समाचारदाता (दमौली)

गण्डकी प्रदेशको पर्यटन तथा नागरिक उड्डयन मन्त्रालयले तनहुँका दुइ वटा पर्यटन पूर्वाधार तथा पर्यटन उपजको विकास तथा प्रवर्द्धन गर्न ७/७ करोड रुपैयाँ विनियोजन गरेको छ । मन्त्रालयले प्रदेशका १५ वटा योजनामा स्थानीय तहको सझेदारीमा कार्यक्रम सञ्चालन गर्ने गरी करिब ६८ करोड रुपैयाँ बजेट बिनियोजन गरेको हो । पूर्वाधार निर्माण तथा पर्यटन उपज विकास साझेदारी निर्देशिका २०७७ अनुसार साझेदारीमा ती आयोजनाहरु सञ्चालन गरिने भएको छ । प्रदेश र स्थानीय तहसंग लागत साझेदारीमा पर्यटकीय गन्तव्य पूर्वाधार विकास कार्यक्रम अन्तर्गत मन्त्रालयको माघ २९ गतेको मन्त्रीस्तरीय बैठकले आयोजनाको छानौट तथा बजेट बिनियोजन गरेको छ ।

उक्त बैठकले तनहुँको बन्दीपुरमा मुकुन्देस्वरी पदमार्ग निर्माणका लागि ७ करोड रुपैयाँ र व्यास नगरपालिकामा व्यास परासर क्षेत्रमा व्यासको १०८ फिट मुर्ति निर्माण योजनाका लागि ७ करोड रुपैयाँ बिनियोजन गरेको हो । दुवै योजनामा मन्त्रालयको ७० र सम्बन्धित स्थानीय तहको ३० प्रतिशत सझेदारी रहने बताइएको छ ।

यस्तै, गण्डकी प्रदेशमा सबैभन्दा धेरै योजना बागलुङ र गोरखामा सञ्चालन हुने भएका छन् । यी जिल्लाहरुमा तीन/तीन वटा योजना छनौट भएको मन्त्रालयले सूचनामार्फत जानकारी गराएको छ । पर्वत र तनहुँमा दुइ/दुइ वटा तथा नवलपुर, म्याग्दी, मुस्ताङ, लमजुङ र मनाङमा एक योजनामा मात्रै बजेट बिनियोजन भएको छ ।

गोरखाको धार्चे गाउँपालिकामा निसरान च्छो पदमार्ग तथा धर्मशाला निर्माण हुनेछ । दुइ बर्षमा काम सक्ने गरी तयारी रहेको एक करोडको योजनाका लागि मन्त्रालयले ७० लाख रुपैयाँ अनुदान दिएको छ भने गाउँपालिकाले ३० लाख रुपैयाँ लगानी गर्नेछ । शिरानचोक गाउँपालिकामा अमरसिंह पार्क निर्माणका लागि ३ करोड रुपैयाँ बजेट बिनियोजन भएको छ । दुइ करोड दश लाख रुपैयाँ मन्त्रालयको अनुदान र ९० लाख रुपैयाँ गाउँपालिकाको साझेदारी रहने छ । अरुघाट गाउँपालिकामा ऐतिहासिक आरुपोखरी पुननिर्माणको योजना छ । २ करोड २८ लाखको योजनाका लागि मन्त्रालयले १ करोड ६० लाख र बाँकी रकम गाउँपालिकाले साझेदारी गर्ने जनाएको छ ।

बागलुङ नगरपालिका-५ र ६ को मालिका सामुदायीक बन क्षेत्रमा बन्यजन्तु संरक्षण तथा पर्यटन प्रबर्द्धन आयोजना सञ्चालन हुने भएको छ । ५ करोड ६५ लाखको योजनामा ३ करोड ६५ लाख मन्त्रालयले र १ करोड ९६ लाख रुपैयाँ बागलुङ नगरले साझेदारी गर्ने नगरप्रमुख जनकराज पौडेलले बताए ।

गलकोट नगरपालिकामा गलकोट टेउवा मुर्तिकला संग्रहालय निर्माण तथा घुम्टेसम्म सडक पहुँच बिस्तारको योजना छनौट भएको छ । दुइ बर्षमा सकिने ७ करोड रुपैयाँ लागतको यो योजनाका लागि मन्त्रालयको ४ करोड ५५ लाख रुपैयाँ अनुदान र नगरपालिकाको २ करोड ४५ लाख रुपैयाँ साझेदारी रहने छ ।

ताराखोला गाउँपालिकामा सांस्कृतिक संग्राहलय निर्माणका लागि बजेट बिनियोजन भएको छ । २ करोड ६६ लाख रुपैयाँको योजनाका लागि एक करोड ८६ लाख रुपैयाँ मन्त्रालय र ८० लाख रुपैयाँ गाउँपालिकाले साझेदारी गर्नेछन् ।

पर्वतको फलेवास नगरपालिकामा मनमोहन बाटिका (डहरे देउराली पर्यटकीयण् क्षेत्र प्रबर्द्धन) योजना छनौट भएको छ । ५ करोडको योजनाका लागि मन्त्रालयले ३ करोड २५ लाख र नगरपालिकाको १ करोड ७५ लाख रुपैयाँ खर्च हुनेछ । कुश्मा नगरपालिकामा गुप्तेश्वर धार्मिक पर्यटन प्रबर्द्धनको योजना छनौट भएको छ । २ करोड ७६ लाखको योजनाका लागि ७० प्रतिशत मन्त्रालय र ३० प्रतिशत नगरपालिकाको खर्च हुने सूचनामा उल्लेख छ ।

नवलपरासीको कावासोतीमा बृहत कावासोती पर्यटन, सिद्धेश्वर धाम एवं टरुवा ताल बिकासका लागि ७ करोड, म्याग्दीको रघुगंगा गाउँपालिकामा सिद्ध फूटस्टेप एण्ड पार्क निर्माणका लागि १ करोड १० लाख, मुस्ताङको लो-घेकर दामोदर कुण्ड गाउँपालिकामा लो-घेकर गुम्बा पुन निर्माणको लागि ४ करोड १३ लाख, लमजुङको बेसीशहर गाउँपालिकामा पुरानो केटगडीमा शान्ति स्तुपासहित भ्यू टावर निर्माणका लागि ४ करोड २६ लाख रुपैयाँ र मनाङको चामे गाउँपालिकामा चामे पार्क निर्माणको लागि ६ करोड ८६ लाख रुपैयाँ बिनियोजन भएको छ । सबै योजनामा सम्बन्धित स्थानीय तहले ३० प्रतिशत बजेट साझेदारी गर्ने मन्त्रालयले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर