भिमादका उत्कृष्ट कार्यसम्पादन गर्ने सात कर्मचारी सम्मानित
भिमाद : तनहुँको भिमाद नगरपालिकाले आर्थिक वर्ष २०८१/०८२ मा उत्कृष्ट कार्यसम्पादन गर्ने सात जना कर्मचारीलाई नगदसहित सम्मान गरेको छ ।
नगरपालिकाको २०औँ नगरसभाको अवसरमा आयोजित कार्यक्रममा प्रशासकीय अधिकृत अजय सुवेदी, लेखापाल श्यामप्रसाद सापकोटा, पशु प्राविधिक सबिन भट्टराई, सब इन्जिनियर टेकप्रसाद जोशी, अमिन सरोज गैरे, स्टाफ नर्स पूर्णिमा नेपाली र कार्यालय सहयोगी तेजमाया श्रेष्ठलाई जनही २५ हजार रुपैयाँ नगद पुरस्कार र सम्मान–पत्रद्वारा सम्मान गरिएको हो ।
उनीहरूलाई नगर प्रमुख दधिराज सुवेदी, उपप्रमुख शारदा खनाल र प्रमुख प्रशासकीय अधिकृत कमल प्रसाद पुनले सम्मान गरेका थिए ।
कार्यक्रममा नगर प्रमुख सुवेदीले उत्कृष्ट कार्य सम्पादन गर्ने कर्मचारीहरूलाई बधाई दिँदै सबै कर्मचारी सेवा प्रवाहमा इमान्दार र जिम्मेवार बन्नुपर्नेमा जोड दिए । उनले कर्मचारी र जनप्रतिनिधिबीचको समन्वय अझ सुदृढ हुनुपर्ने उल्लेख गर्दै यस्ता सम्मानले कर्मचारीलाई थप प्रेरणा र हौसला प्रदान गर्ने विश्वास व्यक्त गरे ।
