तनहुँको देवघाटमा अलपत्र ८३ वर्षीय वृद्धको उद्धार

तनहुँको देवघाट गाउँपालिका वडा नम्बर ५ भित्र करीब बीस बर्षदेखि बसोबास गर्दै आएका ८३ वर्षीय वृद्ध कृष्ण बहादुर न्यौपानेलाई गाउँपालिकाका अध्यक्षको नेतृत्वका टोलीले उद्धार गरेका छन् । केही दिनदेखि बिरामी भएर एक्लै घरमा बसिरहेका ती वृद्धालाई उद्धार गरी मानव सेवा आश्रममा राखिएको गाउँपालिका अध्यक्ष दुर्ग बहादुर थापाले बताए ।

देवघाटको पुरानो झोलुङ्गे पुलमा बसेर आफ्नो दैनिक गुजारा चलाउँदै आएका वृद्ध दोहोरो कुरा गर्न नसक्ने, कान कम सुन्ने र आँखा पनि कम देख्ने अवस्था भएको र उनि बिगत २० दिनदेखि बिरामी भएर काठको सामान्य घरमा एक्लै बस्दै आएका थिए । उद्धारका क्रममा वृद्धको साथबाट मागेर जम्मा गरेको पाँच हजार रुपैयाँ भेटिएको र उक्त रकम मानव सेवा आश्रमलाई नै बुझाइएको छ । वृद्धको कोरोना परीक्षण र स्वास्थ्य उपचार भने देवघाटको धर्मार्थ अस्पतालमा गरिएको थियो । स्वास्थ्यमा क्रमिक सुधार र कोरोना परीक्षण रिपोर्ट नेगेटिभ आएपछि मानव सेवा आश्रममा लगिएको गाउँपालिकाका अध्यक्ष थापाले बताए ।

गाउँपालिकाले निषेधाज्ञाका कारण समस्यामा परेका वृद्धवृद्धाको उद्धार गरी मानव सेवा आश्रममा राख्ने गर्दै आएको छ । गाउँपालिकाले आगामी आर्थिक वर्षको बजेटमा मानव सेवा आश्रमलाई पनि यथाचित बजेट विनियोजन गर्ने तयारी गरेको गाउँपालिकाले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर