देवघाट गाउँपालिका-१ को कोटामा कृषि उपज संकलन केन्द्र सञ्चालनमा
- भञ्ज्याङ समाचारदाता (देवघाट)
तनहुँको देवघाट गाउँपालिका-१ को कोटामा कृषि उपज संकलन केन्द्र एवं हाटबजार सञ्चालनमा ल्याइएको छ । वडा नम्बर १ कोटा स्थित हाटबजारको उद्घाटन गर्दै गाउँपालिकाका अध्यक्ष दुर्गवहादुर थापाले ‘हाम्रो देवघाट, समृद्ध देवघाट’ भन्ने मुल नारालाई आत्मासाथ गर्दै देवघाट गाउँपालिकाले एक वडा एक कृषि संकलन केन्द्र र एक वडा एक नमुना गाउँको निर्माण गर्ने लक्ष्य लिएको बताए ।
अध्यक्ष थापाले देवघाट गाउँपालिका-१ कोटामा कृषकहरु धेरै रहेको हुनाले मौसम अनुसारको कृषि उत्पादन पनि बढी हुने हुँदा कृषि उपज संकलन केन्द्र एवं हाटबजारको अति आवश्यक रहेको बताए ।
कार्यक्रमका अवसरमा निःशुल्क स्वास्थ्य शिविर, खसी बोका बाख्रा प्रदर्शनी, वडा भित्रका विद्यालय बीच हाजिरीजवाफ प्रतियोगिता, नित्य प्रतियोगिता र बाल विकास केन्द्रका बालबालिकाहरूको प्रतिभा प्रस्फुटन कार्यक्रम गरिएका थिए ।
कृषि उपज संकलन केन्द्र एवं हाटबजार व्यवस्थापन समितिका अध्यक्ष समीर गुरूङको अध्यक्षतामा आयोजित कार्यक्रममा वडा नम्बर १ का वडा अध्यक्ष भिम वहादुर गुरूङ, कार्यपालिका सदस्य चन्द्रप्रकाश बि.क., वडा सदस्य सुन्दर भुजेल, देवघाट गाउँपालिकाका पशु तथा कृषि शाखा प्रमुख पूर्णचन्द्र अधिकारी, शिक्षा शाखाका सुभद्रा भट्टराइ लगायतले आ-आफ्ना विचार व्यक्त गरेका थिए ।
