२० दिनपछि ऋषिङको मुख्य सडक खुल्यो

तनहुँको ऋषिङ गाउँपालिका जाने मुख्य सडक २० दिनपछि पूर्ण रुपमा सुचारु भएको छ । गत असार २४ गते आएको पहिराले अवरुद्ध भएको श्रृङ्गपथ विहीबारबाट पूर्ण रुपमा सञ्चालनमा आएको हो । पहिराका कारण उक्त सडकखण्डको ऋषिङ गाउँपालिका-८ अजम्बरीभिर पूर्ण रुपमा बन्द थियो । पहिरो हटाएर उक्त खण्ड नियमित गरिएको गाउँपालिकाका प्रवक्ता विजय दरैले जानकारी दिए । गाउँपालिका जाने मुख्य सडकखण्ड पहिराले
अवरुद्ध हुँदा सर्वसाधारणले सास्ती झेल्दै आएका थिए ।

‘गाउँपालिकाकै पहलमा विहीबारबाट पहिरा हटाइ ठूला सवारी साधनसमेत सञ्चालन भइसकेको छ, ठूलो पहिरा भएका कारण पूर्ण रुपमा सुचारु गराउन समय लाग्यो’, दरैले भने । उक्त खण्ड पहिराले अवरुद्ध हुँदा झापुटार हुँदै सर्वसाधारण गाउँपालिकासम्म जानुपर्ने बाध्यता थियो ।

असारमा आएको पहिराले जिल्लाका अधिकांश ग्रामीण भेगका सडक अवरुद्ध भएका थिए । अधिकांश स्थानमा पहिरा हटाएर बाटो नियमित भएको छ भने अझै पनि केही ठाउँमा पहिरो हटाउन बाँकी छ । अविरल झरीसंगै आएको बाढीपहिरोका कारण ऋषिङका दुइ जनाको मृत्यु भएको छ भने दर्जनौ घरपरिवार विस्थापित भएका छन् । पहिरोका कारण कृषि, पशुपालनका क्षेत्रमा पनि ठूलो क्षति पुगेको गाउँपालिकाले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर