अनुमति बिनै खुलेका विद्यालय तनहुँ प्रशासनले बन्द गरायो, दैनिक संक्रमितको संख्या बढ्दो

तनहुँमा कोभिड-१९ संक्रमण जोखिम बढ्दै गएको छ । संक्रमण जोखिम कायमै रहेको भन्दै स्थानीय प्रशासनले साउन २० गतेसम्म निषेधाज्ञा केही खुकुलो बनाउँदै लम्ब्याएको छ । तर, जिल्लाका केही स्थानीय तहमा विद्यार्थीलाई भौतिक रुपमै उपस्थित गर्राई पठनपाठन सुचारु गर्न थालिएको छ । जिल्ला संकट व्यवस्थापन केन्द्र तनहुँले कोरोनाको जोखिम कायमै रहेकाले तत्काल विद्यालय सञ्चालन नगर्न निर्देशन दिए पनि उक्त निर्देशनको अटेरी गर्दै तनहुँको केही सामुदायिक तथा निजी विद्यालय सञ्चालनमा ल्याइएको छ ।

पछिल्लो समय निषेधाज्ञा खुकुलो भएसँगै कोरोना संक्रमण थप वृद्धि भइरहेको छ । यस्तो जोखिमकै बीचमा विद्यालय सञ्चालनमा आएपछि बालबालिका झनै जोखिममा परेका छन् । निजी विद्यालयले विद्यालय पोशाक विना विद्यार्थी विद्यालयमा बोलाएका छन् भने सामुदायिक विद्यालयले विद्यालय पोशाकमै विद्यार्थी बोलाएर पठनपाठन शुरु गरेपछि प्रशासनले तत्काल पठनपाठन रोक्न भनेको छ । कोभिडको उच्च जोखिम रहेकै अवस्थामा सामुदायीक तथा संस्थागत विद्यालयहरु आइतबारबाट खुल्न थालेका थिए । व्यास नगरपालिकाको अनुमती पछि नगरपालिका भित्रका विद्यालयहरु सोमबारबाट सञ्चालनमा ल्याइएपनि केही सामुदायीक विद्यालयहरु गत साताबाट पनि सञ्चालन भएका थिए ।

विद्यालय सञ्चालन भएपछि त्रासकै विच पनि विद्यार्थीहरु विद्यालय गएका छन् । देशभर बैकल्पिक विधिबाट अनलाइन कक्षा स१चालन भईरहेको समयमा व्यास नगरपालिका भित्रका विद्यालय सन्चालन गर्ने जोखिमपुर्ण कार्य भएको थियो । विशेषगरि नीजि विद्यालयहरुको चर्को दवावपछि व्यासले विद्यालय खुल्ला गर्न अनुमति दिएको बताइएको छ ।

व्यास नगरपालिकाले औपचारिक निर्णय नगरेपनि विद्यालय सञ्चालन गर्न सञ्चालकहरुलाई अनुमती भने दिएको थियो । अनलाइन कक्षा मात्र सञ्चालन गर्दा विद्यार्थी तथा अभिभावकसँग शुल्क लिन अप्ठ्यारो भएपछि दमौलीका नीजि विद्यालयले भौतिक रुपमै कक्षा सञ्चालन गर्ने निर्णय गरेका थिए । तर व्यास नगरपालिकाले भने निषेधाज्ञाको उल्लंघन गर्दै विद्यार्थीको भौतिक उपस्थितीमै पठन पाठन गर्न अनुमती दिएको बताइएको छ ।

यता व्यास नगरपालिकाका शिक्षा शाखाका प्रमुख नगेन्द्र रेग्मीले विद्यालय सञ्चालन गर्न नगरपालिकाले अनुमती नदिएको बताएका छन् । केही विद्यालयका सञ्चालकले आफै विद्यालय खोल्यौं भनेर नगरपालिकामा जानकारी दिएको तर नगरपालिकाले कुनै अनुमती नदिएको रेग्मीले बताए । जिल्ला प्रशासन कार्यालयमा सोमबार भएको बैठकमा तत्काल विद्यालय सञ्चालन नगर्ने निर्णय भएको र सोमबारबाट सञ्चालनमा आएका विद्यालयहरु पनि मंगलबारबाट बन्द गरी अनलाइन कक्षालाई नै निरन्तरता र प्रभावकारी बनाउने निर्णय भएको रेग्मीले बताए ।

यस्तै, प्रमुख जिल्ला अधिकारी सागर आचार्यले निषेधाज्ञाको उल्लंघन गर्दै विद्यालय सञ्चालन गर्न नपाइने बताएका छन् । जिल्लामा कोभिडको जोखिम कायमै रहेको भन्दै जिल्ला कोभिड संकट व्यवस्थापन केन्द्रको निर्णय र सिफारिस अनुसार निषेधाज्ञा लगाइएको उनले बताए ।

विद्यालय सञ्चालन गर्नु निषेधाज्ञाको उल्लंघन भएको हुँदा त्यस्तो कार्य गर्न नपाइने प्रजिअ आचार्यको भनाई छ । जिल्लामा कोभिडको जोखिम कायमै रहेको हुँदा सबैले स्वास्थ्य सुरक्षाको कडाइका साथ पालना गर्नुपर्ने र अभिभावकले पनि आफ्ना बालबालिकाको स्वास्थ्यमा खेलवाड नगर्न प्रजिअ आचार्यले आग्रह गरेका छन् । जिल्ला प्रशासन कार्यालयमा सोमबार बसेको सरोकारवालाको बैठकले अर्को निर्णय नभएसम्म विद्यालय सञ्चालन नगर्ने निर्णय गरेको छ ।

स्वास्थ्य कार्यालय तनहुँको तथ्याङ्क अनुसार सोमबार ४८ जना थपिएसंगै सक्रिय संक्रमितको संख्या ४८५ जना पुगेको छ । गत साता सक्रिय संक्रमितको संख्या २ सयमा झरेको भएपनि स्वास्थ्य सुरक्षाको मापदण्ड पालनामा लापरवाही बढ्दै गएको छटा भिडभाडजन्य गतिविधि बढ्दै गएकाले कोरोना संक्रमण बढ्दै गएको स्वास्थ्य प्रमुख शंकरबाबु अधिकारीले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर