तनहुँको व्यास नगरपालिकाद्वारा पत्रकारलाई बीमा

तनहुँको ब्यास नगरपालिकाको सहयोग तथा नेपाल पत्रकार महासंघ तनहुँको समन्वयमा जिल्लाका पत्रकारको आरोग्य बीमा गरिएको छ । जिल्लामा रही सक्रिय रूपमा काम गर्दै आएका ६७ जना पत्रकारको सगरमाथा इन्सुरेन्स बीमा कम्पनी दमौलीबाट बीमा गरिएको हो । नगरपालिकाले एक पत्रकारलाई एक हजार पाँच सय ५० रुपैयाँका दरले एक लाख तीन हजार आठ सय ५० रुपैयाँ प्रिमियम भुक्तानी गरिदिएको नेपाल पत्रकार महासंघ तनहुँका अध्यक्ष उज्ज्वल पौडेलले बताए । बाँकी अपुग रकम करिब तीन हजार दुइ सय रुपैयाँ महासंघ तनहुँले व्यवस्थापन गरेको छ ।

अध्यक्ष पौडेलका अनुसार कूल ६ करोड तीन लाख रुपैयाँ बराबरको बीमा गरिएको छ । एक जना पत्रकारको नौ लाख रुपैयाँका दरले बीमा गरिएको बताइएको छ । वीमा अन्तरगत सात लाख रुपैयाँ दुर्घटना बीमा र दुइ लाख रुपैयाँ स्वास्थ्य उपचारसम्बन्धी बीमा गरिएको छ ।

यस्तै, जिल्लाका पत्रकारको क्षमता वृद्धि तथा लोक कल्याणकारी विज्ञापन लगायतका क्षेत्रमा ब्यास नगरपालिकाले योगदान गर्दै आएको नेपाल पत्रकार महासंघका केन्द्रीय सदस्य एवं जिल्लाका पूर्वअध्यक्ष प्रदीप काफ्लेले बताए ।

रिपोर्टिङको सिलसिलामा पत्रकारहरू हिँडीराख्नुपर्ने भएकाले जोखिम बहनका लागि नगरपालिकाले बीमामा सहयोग गरेको ब्यास नगरपालिकाका नगरप्रमुख बैकुण्ठ न्यौपानेले बताए । उनले भने, ‘पत्रकार तथा सञ्चार क्षेत्रको विकासका लागि नगरपालिका सधै सकारत्मक रहेको छ।’ नगरपालिकाले गत वर्ष एक लाख रुपैयाँको कोरोना बीमासमेत गरिदिएको थियो । उक्त बीमा पोलिसी मंगलबार नगरप्रमुख न्यौपानेले पत्रकारलाई प्रदान गरेका छन् ।

सेयर गर्नुहोस्

प्रतिक्रिया दिनुहोस्

सम्बन्धित खवर