चाडपर्वले बजारमा चहलपहल बढ्यो

• भञ्ज्याङ समाचारदाता/दमौली

नेपालीहरुको महान पर्व वडा दशै तथा दिपावली नजिकिएसंगै तनहुँका बजार क्षेत्रमा मानिसहरुको चहलपहल बढेको छ । चाडपर्व लक्षित किनमेल लगायतका गतिविधिका कारण अहिले बजार क्षेत्रमा मानिसहरुको उपस्थिति बाक्लिदै गएको छ । बजार क्षेत्रमा बढेको भिडभाडजन्य गतिविधिले सुस्ताएको कोरोना भाइरस संक्रमण पुनः फैलने हो कि भन्ने त्रास पनि बढाएको छ । नागरिकस्तरबाट भएको लापरवाहीका कारण कोरोना संक्रमणको जोखिम उच्च रहेको स्वास्थ्य कार्यालय तनहुँले जनाएको छ ।

सार्वजनिक स्थलहरुमा स्वास्थ्य सुरक्षाका सावधानी नअप्नाई हिड्डुल गर्नाले जिल्लामा संक्रमणको जोखिम रहेको स्वास्थ्य कार्यालय तनहुँका प्रमुख शंकरबाबु अधिकारीले बताए । उनले भने, ‘सक्दो चाडै जिल्लाबासीलाई खोपको दायरामा ल्याउने कोशिस गरिरहेका छौं । तर खोप लगाएपछि कोरोना संक्रमण नहुने भने होइन ।’ हालसम्म जिल्लाका ८५ हजार ८१७ जनालाई पहिलो मात्रा र ६४ हजार ९८० जनालाई दोस्रो मात्रको खोप लगाइसकिएको छ ।

पछिल्ला दिनमा कोरोनालाई सामान्य ठान्दै बजार क्षेत्रमा भिडभाड हुन थालेको छ । चार्डपर्व नजिकिएसंगै जिल्लाको आँबुखैरेनी, डुम्रे, भन्सार, तुरतुरे, दमौली, थर्पु, खैरेनीटार, दुलेगौडा, कोत्रे, भिमाद लगायतका बजार क्षेत्रमा यतिबेला मानिसहरुको चहलपहल बढेको छ । विशेष गरी दसै पर्वलाई लक्षित गरी नयाँ कपडा खरिदका लागि फेन्सिमा मानिसहरुको बढि भिड देखिन थालेको छ । यीसंगै खाद्यान्य, बैंक तथा वित्तिया संघसंस्थामा पनि मानिसहरुको भिडभाड हुन थालेको छ ।

कोरोना संक्रमणको त्रास कायममै रहेता पनि व्यवसाय खोलेर बस्न बाँध्य रहेको व्यास नगरपालिका-२ का सुनचाँदी व्यवासायी उत्तम सुनारले बताए । ‘विवाह तथा चाडपर्वको सिजन छ, सबै पसलहरु खुल्ला छन् कोरोनाको डरले कति पसल बन्द गरेर बस्नु’, उनले भने, ‘पसलमा आउने ग्राहकलाई मास्क लगाउनुस्, स्यानिटाइजरको प्रयोग गर्नुस् त भन्ने गरेका छौं तर, कतिले मान्नुहुन्छ कतिले मान्नुहुन्न ।’

यस्तै, चाडपर्वकै समयमै लत्ताकपडा बिक्री बितरण हुने व्यास-२ की फेन्सि व्यवसायी प्रमिला श्रेष्ठले बताइन् । उनले भनिन्, ‘बजार क्षेत्रमा फेन्सि खोलर बसेको छु, ग्राहक आएनन् भने व्यवसाय ठप्प हुन्छ । आएका ग्राहकलाई स्वास्थ्य सुरक्षाका सावधानी अप्नाएर मात्र आउनुस् भन्दा कोही आउछन्, कोही सुनेरै फर्किन्छन् ।’

कोरोना संक्रमण रोकथामका लागि गरिएको निषेधाज्ञा र अहिले सोचेजस्तो ग्राहकहरु नहुँदा व्यवासायीहरु मारमा परेको बताउँछन् । तर बजार क्षेत्रमा भएको भिडभाडले भने स्वास्थ्यकर्मीहरु चिन्तित छन् । पछिल्लो समय स्वास्थ्य विज्ञले तेस्रो लहरको कोरोना भाइरस संक्रमणको खतरा रहेको बताएका छन्् । यसबाट बालबालिकाहरु बढी जोखिममा पर्ने खतरा रहेको हुँदा विशेष ध्यान दिनुपर्ने दमौली अस्पतालका मेडिकल सुपरिटेन्डेन्ट सुनिल पौड्यालले बताए ।

‘अहिले धेरै बालबालिकाहरुमा भाइरल ज्वारो पनि देखिएको छ’, उनले भने, ‘समयमै ध्यान दिइएन भने यसको जोखिम बढ्दै जान सक्छ । त्यसैले सम्पूर्ण जिल्लाबासीलाई अनावश्यक रुपमा घरबाहिरा ननिस्कन, निस्कनै परे स्वास्थ्य सुरक्षाका सावधानी अप्नाउन र आफ्ना बालबालिकाकोे स्वास्थ्य सुरक्षामा ध्यान राख्न आग्रह गरिएको छ ।’

सेयर गर्नुहोस्

प्रतिक्रिया दिनुहोस्

सम्बन्धित खवर