ऋषिङ खुल्ला अल्ट्रा म्याराथनमा २४ धावकको नाम दर्ता

तनहुँको ऋषिङ गाउँपालिकाले आयोजना गरेको दोस्रो ऋषिङ खुल्ला अल्ट्रा म्याराथनमा सहभागि हुन हालसम्म २४ जना धावकले नाम दर्ता गराएका छन् । यही पुस २७ गते हुने प्रतियोगितामा खुल्ला तर्फ २४ जना धावकले नाम दर्ता गरिसकेको खेल संयोजक दानबहादुर श्रेष्ठले बताए । स्थानीय दौड प्रतियोगितामा भाग लिने धावकहरुले समेत नाम दर्ता गरिरहेका छन । १ किलोमिटरमा स्वयंसेवक र ५ किलोमिटरमा प्राथमिक उपचार केन्द्र राख्ने गरी प्रतियोगिताको तयारी भइरहेको बताइएको छ । ती केन्द्रहरुमा १ जना चिकित्सक, २ जना नर्स, २ जना अहेब सहितको स्वास्थ्यकर्मीको टोली रहने छन् । ६ वटा मोटरसाइकलले प्रतियोगिताको अवधिभर स्कटिङ गर्ने छ । ऋषिङदेखि दुबुङसम्मको मार्गमा रहेको खाल्टाखुल्टी पुर्ने, बाटो चौडा गर्ने, गेटहरु निर्माण गर्ने काम समेत भइरहेको गाउँपालिकाले जनाएको छ ।

‘ऋषिङ समृद्धिको आधार कृषि संस्कृति, पर्यटन र पूर्वाधार’ भन्ने मुल नाराका साथ आयोजित अल्ट्रा म्याराथनको खुल्ला म्याराथनतर्फ प्रथम, द्वितीय, तृतीय र सान्त्वना हुनेलाई क्रमशः ६५ हजार, ४० हजार, २५ हजार र १० हजार रुपैयाँका साथै मेडल, ट्रफी र प्रमाणपत्र उपलब्ध गराइने गाउँपालिकाका अध्यक्ष राजेन्द्र कृष्ण श्रेष्ठले बताए ।

त्यस्तै स्थानीय म्याराथन तर्फ प्रथम, द्वितीय, तृतीय र सान्त्वना हुनेलाई क्रमशः १५ हजार, १० हजार, ६ हजार र २ हजारका साथै मेडल, ट्रफी र प्रमाणपत्रले पुरस्कृत गरिने भएको छ । प्रतियोगितामा महिला सर्ट म्याराथनतर्फ प्रथम, द्वितीय, तृतीय र सान्त्वना हुनेलाई क्रमशः १० हजार, ८ हजार, ५ हजार र २ हजार रुपैयाँ उपलब्ध गराइने भएको छ । म्याराथनमा सहभागी हुन चाहने धावकहरुले पुस २५ गते बिहान १० बजेसम्म फाराम भर्न सक्नेछन ।

खुल्ला म्याराथनतर्फ धारुङ भञ्ज्याङदेखि दौड शुरु भइ ऋषिङ प्रवेशद्वार, रानीपोखरी, गाउँपालिकाको कार्यालय, अर्खलाछाप, काफलडाँडा, पुरानो ऋषिङ -चालिसे) पोखरीभञ्ज्याङ, गोठादी, ढुंगाडे, भिरकोट अर्चल्दी, मौरीबास, दाङसिरी, हुँदै दुबुङकोट भ्यू टावरमा पुगेर समापन हुनेछ । स्थानीय म्याराथनका लागि धारुङ भञ्ज्याङबाट शुरु भइ रानीपोखरी, गाउँपालिकाको कार्यालय, अर्खलाछाप, केउराडी, ज्यामिरेमाइ मन्दिरमा पुगेर समापन हुनेछ । महिला सर्ट म्याराथनतर्फ धारुङ भञ्ज्याङदेखि रानीपोखरी, गोर्खाली चौतारी, गैराथोक, दुर्गा मन्दिर, कोट दरबार, दुर्गा भवानी मन्दिर सम्मको रुट चयन गरिएको गाउँपालिकाले जनाएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर