प्रति हजार मतगणना गर्दा १२ प्रतिशत बढि मत बदर

स्थानीय तह सदस्य निर्वाचनको मतगणना अहिले जारी छ । तनहुँको चार नगरपालिका र छ गाउँपालिका गरी १० पालिका मध्ये अहिले व्यास नगरपालिका बाहेकका पालिकाहरुमा मतगणना चलिरहेको छ । जिल्लाका ८५ वडा मध्ये यो समाचार तयार गर्दाको समयसम्म २३ वडाको अन्तिम मतपरिणाम सार्वजनिक भएका छन् । यस्तै, नौ वटै पालिकाका प्रमुख/अध्यक्ष, उपप्रमुख/उपाध्यक्षहरुको प्रारम्भिक मतपरिणमहरु पनि सार्वजनिक भइरहेका छन् ।

सार्वजनिक मतमरिणमसंगै बदर मतको दर पनि बढेको छ । प्रारम्भिक मत परिणमको प्रति हजार मतमा १२ प्रतिशत बढि मत बदर भएको भेट्टएिको छ । जिल्लाको शुक्लागण्डकी नगरपालिकामा आइतबार साँझसम्म भएको ६ हजार ९९० मतगणनामा प्रमुख पदमा ५८४ र उपप्रमुखमा एक हजार ४८२ मत बदर भएको छ । मत बदुरको अवस्थालाई हर्ेदा कतै चिन्हमा छाप नै नलगाएको र कतै उम्मेद्वार नै नभएको चिन्हमा छाप लगाउदा मत बदर भएको भेटिएको निर्वाचन अधिकृतको कार्यालयले जानकारी गराएको छ ।

शुक्लागण्डकीमा नेपाली कांग्रेस र नेकपा माओवादी केन्द्रबिच गठबन्धन भएको छ । कांग्रेसबाट मेयर र माओवादी केन्द्रबाट उपमेयरमा उम्मेदवारी दिएका छन् । यहि गठबन्धनका कारण पनि मत बदर बढि हुन पुगेको निर्वाचन अधिकृत सरिता रायामाझिले बताइन् । उनले भनिन्, ‘रुख चिन्हको उपप्रमुखको उम्मेद्वार नभएपनि मत आएको छ र यसलाई बदर मतमा गनिएको छ ।’ ‘उम्मेद्वारनै नभएको चिन्हमा छाप, कुनै मतपत्र छापबिनै आएको, कुनै मतपत्रमा औठाछाप लगाइएको र कुनैमा डबल छाप हानिएको छ’, उनले भनिन्, ‘यी कारणले मत बदर बढि देखिएको छ ।’

यस्तै भानु नगरपालिकामा पनि उम्मेद्वार नै नभएको चिन्हमा मतदाताले मत हालेका छन् । सहायक निर्वाचन अधिकृत हरिश्चन्द्र गौतमका अनुसार २ हजार ७५० मतगणना गर्दा उम्मेद्वार नै नभएको सूर्य चिन्हको उपाध्यक्षमा ३०९, कलम चिन्हको प्रमुखमा ५ र कैची चिन्हको प्रमुखमा ९ भोट खसेको छ । यी भोट बदरमा गणना भएका छन् ।

भानुमा नेकपा एमाले र जोशी समूहबिच चुनावी तालमेल गरिएको छ । एमालेबाट प्रमुख र जोशी समूहबाट उपप्रमुखमा उम्मेद्वारी दिएका छन् । कैची जोशी समूहको चुनावी चिन्ह हो । यस्तै, आँबुखैरेनी गाउँपालिका-२ मा एक हजार मतगणना हुँदा अध्यक्षमा १२१ र उपाध्यक्षमा १६२ मत बदर भएको छ ।

ऋषिङ गाउँपालिकाको वडा नम्बर १ मा एक हजार ८३६ मतगणना हुँदा अध्यक्षमा २३४ र उपाध्यक्षमा २१७ मत बदर भएको छ । ठुलो मतपत्र र धेरै चुनाव चिन्हका कारण मतदाता झुक्किन पुगेको निर्वाचन कार्यालय तनहुँका प्रमुख हरि ढकाल बताउँछन्। उनले भने, ‘मतपत्रमा भएका धेरै चुनाव चिन्ह र पालिकाअनुसर राजनीतिक दलका गठबन्धनले गर्दा पनि मत बदर बढि देखिएको छ ।’

‘२०७४ सालको निर्वाचनमा राजनीतिक दल एकल चुनावमा होमिएका थिए र त्यो समय मतदाता शिक्षा पनि थियो’, उनले भने, ‘अहिले चिन्ह आ-आफ्नो तर गठबन्धन गरी चुनावमा होमिएका छन् । एउटै चिन्हमा मत हाल्न बानी परेकाले उम्मेद्वार नभएको चिन्हमा पनि मत हाल्न पुगे ।’ निर्वाचन आयोगले मतदाता शिक्षा नदिदा र राजनीतिक दलका उम्मेदवारहरु पनि भोट माग्ने तर मत कसरी हाल्ने, गठबन्धनका दलहरुले कुन ठाउँमा उम्मेद्वार छैन भनेर मतदाताहरुलाई राम्ररी नसिकाउँदा पनि मत बदर भएको देखिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर