मापदण्ड विपरित उत्खनन् गरिएको नदीजन्य सामाग्री सिल

तनहुँको बन्दिपुर गाउँपालिका-५ याम्पाघाटस्थित मर्स्याङ्दी नदी किनारमा मापदण्ड विपरित उत्खनन् गरी राखिएको नदीजन्य सामग्री गाउँपालिकाले सिल गरेको छ । नदीबाट मापदण्ड विपरित उत्खनन् गरी राखिएको ढुंगा, गिटी, बालुवा गाउँपालिकाले आइतबार सिल गरेको हो ।

गाउँपालिकाका अध्यक्ष सुरेन्द्र थापा, वडा नम्बर ५ का वडाध्यक्ष ध्रुव लामिछाने, वडा नम्बर १ का वडाध्यक्ष एवं गाउँपालिकाका प्रवक्ता शिवकुमार श्रेष्ठ सहितको टोलीले उक्त ठाउँको अनुगमन गरी मापदण्ड विपरित राखेको पाइएपछि सिल गरिएको हो ।

मर्स्याङ्दी नदी किनारमा आर्थिक वर्ष २०७८/०७९ का लागि गाउँपालिकाले तीन हजार एक सय घनमिटर उत्खनन्का लागि ठेक्का आहृवान गरेको थियो । तर मापदण्ड विपरित एक्साभेटर प्रयोग गरी १२ हजार एक सय घनमिटर ढुङ्गा, गिटी र बालुवा उत्खनन् गरेको पाइएको प्रवक्ता श्रेष्ठले बताए । गाउँपालिकाले केही दिन अगाडी मात्रै वडा नम्बर ६ स्थित साराङघाटमा रहेको क्रसर उद्योग पनि अनुगमन गरी सिल गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर