विकासको गतिले तीव्रता पाउँछ : वरिष्ठ नेता पौडेल

नेपाली कांग्रेसका वरिष्ठ नेता रामचन्द्र पौडेलले देश एउटा गतिमा अगाडि बढिसकेकाले अब विकासको कामलाई तीव्रता दिने बताएका छन् । तनहुँको भानु नगरपालिका-१ स्थित भन्सार युवा क्लबको आयोजनामा सञ्चालित भानु कप फुटबल प्रतियोगिताको समापन कार्यक्रममा बोल्दै उनले देशले निकास पाएकाले अब विकासका कामले पनि तीव्रता पाउने उल्लेख गरे ।

संविधान निर्माण र संविधानको कार्यान्वयनले गर्दा विकासको काम केही समय रोकिएको बताउँदै वरिष्ठ नेता पौडेलले अब विकासको कामलाई पनि टुङ्गोमा पुर्‍याउने बताए । पौडेलले भने, ‘संविधानको पालना गर्नुपर्दा रोकिएका विकासको काममा ध्यान दिन सकेका थिएनौँ, अब तनहुँमा विकासले काँचुली फेर्छ ।’

उनले पाँचदलीय गठबन्धन कायमै रहने बताए । स्थानीय तह निर्वाचनमा गरिएको गठबन्धन सफल भएको बताउँदै पौडेलले आगामी निर्वाचनसम्म गठबन्धनले निरन्तरता पाउने बताए । उनले भने, ‘गठबन्धन अहिलेको आवश्यकता हो, यसमा तलमाथि हुँदैन ।’

पौडेलले आदिकवि भानुभक्त आचार्यको जन्मगाउँलाई विश्वकै पर्यटकीय धार्मिक गन्तव्य बनाइने बताए । उनले भने, ‘जसरी मक्का मदिना आज मुस्लिम समुदायको आकर्षणको केन्द्र बनेको छ, भानु जन्मस्थललाई पनि धार्मिक साहित्यको केन्द्र बनाउनेतर्फ लागिपरेका छौं ।’

भानु कपको उपाधि तनहुँ-११ ले जित्यो

२०९औं भानु जयन्तीको अवसरमा आयोजित भानु कप राष्ट्रिय फुटबल प्रतियोगिताको उपाधि तनहुँ-११ ले जितेको छ । भन्सार युवा क्लवको आयोजनामा भानु नगरपालिका-१ मा बुधबार सञ्चालित फाइनल खेलमा सिद्धगुफा युवा क्लवलाई पराजित गर्दै तनहुँ-११ ले पन्ध्रौ भानु कपको उपाधि आफ्नो पोल्टामा पार्न सफल भएको हो ।

सिद्धगुफा युवा क्लवलाई २-० गोल अन्तरले पराजित गर्दै तनहुँ-११ ले उपाधि जितेको हो । विजयीसँगै तनहुँ-११ ले नगद दुइ लाख रुपैयाँ, ट्रफी र मेडल प्राप्त गरेको छ । उपविजेता सिद्धगुफा युवा क्लवले नगद एक लाख रुपैयाँ, ट्रफी र मेडल प्राप्त गरेको छ ।

यस्तै, फाइनल खेलको म्यान अफ दि म्याच सिद्धगुफा युवा क्लवका सन्दिप थापा घोषित भएका छन् । प्रतियोगिता अवधिभर र्सवाधिक गोलकर्ता तनहुँ-११ का दिपेश आले घोषित भए । उनले प्रतियोगिता नौ गोल गरेका थिए ।

उत्कृष्ट गोलरक्षकको उपाधि तनहुँ-११ का प्रदीप भण्डारीले प्राप्त गरे । अनुशासित क्लवको उपाधि मर्स्याङ्दी युवा क्लव गोरखाले पाएको छ भने उत्कृष्ट खेलाडी तनहुँ-११ का रन्दिप पौडेल घोषित भएको आयोजक क्लवका अध्यक्ष अर्जुनकुमार श्रेष्ठले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर