तनहुँका सबै मतदान केन्द्रमा पुगे कर्मचारी र आवश्यक सामाग्री, मतदान अधिकृतले गरे सर्वदालीय बैठक
भञ्ज्याङ न्यूज
मंसिर ४ गते हुने प्रतिनिधिसभा र प्रदेशसभा सदस्य निर्वाचनको आवश्यक तयारी पुरा गरिएको छ । तनहुँका १४२ वटै मतदान स्थलमा कायम गरिएको मतदान केन्द्रमा मतदानका लागि आवश्यक पर्ने सामाग्री सहित कर्मचारी पुगेका छन् ।
निर्वाचनमा खट्टएिका मतदान अधिकृत, सहायक मतदान अधिकृत, सुरक्षाकर्मी तथा कर्मचारीहरु विहीबार मुख्य निर्वाचन तथा निर्वाचन अधिकृतको कार्यालयबाट मतपत्र र निर्वाचनका आवश्यक सामाग्र सहित आ-आफ्ना मतदान केन्द्रमा पुगेका थिए ।
मतदान केन्द्रमा पुगेका मतदान अधिकृतहरुले शुक्रबार मतदान केन्द्रमा सर्वदलीय बैठक गरी मतदान कार्यलाई के कसरी अगाडि बढाउने भन्ने विषयमा आवश्यक निर्णय गरेका छन् ।
व्यास-१२ स्थित श्री सिद्धेश्वरी माध्यमिक विद्यालय कमलवारी मतदान केन्द्रका मतदान अधिकृत एवं भानु नगरपालिकाका शिक्षा अधिकारी ध्रुवराज पौडेलले सर्वदलीय बैठक सौहार्दपूर्ण वातावरणमा सम्पन्न भएको बताएका छन् ।
मंसीर ४ गते आइतबार बिहान ७ बजेबाट हुने प्रतिनिधिसभा सदस्य तथा प्रदेशसभा सदस्य निर्वाचनलाई शान्तिपूर्ण, भयरहित, मर्यादित र निष्पक्षरूपमा सम्पन्न गर्नका लागि निर्वाचन आयोगबाट जारी आचारसंहितालाई पालना गर्दै गराउँदै निर्वाचन सम्पन्न गराउन आ-आफ्नो क्षेत्रबाट सहयोग गर्ने प्रतिवद्धता जनाइएको पौडेलले बताए ।
तनहुँका २ वटै निर्वाचन क्षेत्रमा रहेको १४२ मतदान स्थलमा कायम गरिएको ३०५ मतदान केन्द्रमा नेकपा एमाले, नेपाली काँग्रेस, नेकपा माओवादी केन्द्र, राष्ट्रिय प्रजातन्त्र पार्टी, एकीकृत समाजवादी र स्वतन्त्र उम्मेदवारका प्रतिनिधिहरूको सहभागितामा बसेको बैठकले मतदान कार्यक्रमलाई भयरहित, शान्तिपूर्ण र सौहार्दपूर्ण वातावरणमा सफल बनाउने प्रतिवद्धता जनाएका छन् ।
तनहुँमा कायम गरिएका १४२ वटा मतदान स्थललाई तीन वर्गमा वर्गीकरण गरी आवश्यक सुरक्षा व्यवस्थापन गरिएको प्रमुख जिल्ला अधिकारी विश्वप्रकाश अर्यालले बताए ।
प्रजिअ अर्यालका अनुसार तनहुँका ६ वटा मतदान स्थल अतिसंवेदनशिल, ५२ वटा मतदान स्थल संवेदनशिल र ८४ वटा मतदान स्थललाई सामान्यमा वर्गीकरण गरिएको छ । निर्वाचनका लागि ३३३ जना सशस्त्र प्रहरी, ४८६ जना नेपाली सेना, ७७८ जना नेपाल प्रहरी र १ हजार ३९२ जना म्यादी प्रहरी खटाइएको उनले बताए ।
तनहुँको १० स्थानीय तहका ८५ वटा वडाकमा रहेका १४२ मतदान स्थलमा कायम गरिएको ३०५ मतदान केन्द्रबाट २ लाख ४८ हजार ४९५ जना मतदातालाई मतदान गरनाउनका लागि २ हजार ४४० जना कर्मचारी खट्टएिका छन् ।
२ प्रतिनिधिसभा सदस्य र ४ प्रदेशसभा सदस्य निर्वाचनका लागि तनहुँबाट विभिन्न राजनीतिक दल तथा स्वतन्त्र गरी ५७ जनाले उम्मेदवारी मनोनयन दर्ता गरी चुनावी मैदानमा उत्रिएका छन् ।
तनहुँको निर्वाचन क्षेत्र नं. १ मा १ लाख २३ हजार ४९० र निर्वाचन क्षेत्र नं. २ मा १ लाख २५ हजार ५ जना गरी २ लाख ४८ हजार ४९५ जना मतदाता रहेका छन् । क्षेत्र नं. १ मा ६९ मतदान स्थलमा १५२ वटा मतदान केन्द्र कायम गरिएको छ भने क्षेत्र नं. २ का ७३ मतदान स्थलमा १५३ वटा मतदान केन्द्र कायम गरिएको जिल्ला निर्वाचन कार्यालय तनहुँले जनाएको छ ।
जिल्ला निर्वाचन कार्यालय, मुख्य निर्वाचन तथा निर्वाचन अधिकृतको कार्यालय र स्थानीय प्रशासनले मंसिर ४ गतेको निर्वाचनलाई भयरहित शान्तिपूर्ण रुपमा सम्पन्न गर्नका लागि आवश्यक तयारीमा जुटेका छन् । यता राजनीतिक दलका उम्मेदवार तथा स्वतन्त्र उम्मेदवारहरु पनि आ-आफ्नो पक्षमा भोट माग्न तथा जोडघटामाउ लागि परेका छन् ।
