विश्वकपमा ३२ वर्षपछि पहिलो खेलमै पराजित भयो अर्जेन्टिना, सुरुवाती अग्रता लिएर ६४ वर्षपछि पहिलो हार
एजेन्शी
कतार विश्वकपकै एक स्तब्धपूर्ण नतिजाका रुपमा साउदी अरबले मंगलबार साँझ दुइपटकको विजेता अर्जेन्टिनालाई २-१ गोलले हराएको छ । समूह सीको आफ्नो पहिलो खेलमा अर्जेन्टिनाले सुरुवाती अग्रता लिएर पनि जोगाउन सकेन ।
साउदी अरबले दोस्रो हाफको सुरुवातमै दुइ शानदार गोल गर्दै अर्जेन्टिनालाई पछाडि पारेको थियो। त्यसअघि पहिलो हाफमा लियोनल मेस्सीले पेनाल्टीमार्फत गोल गर्दै अर्जेन्टिनालाई अग्रता दिलाएका थिए ।
अर्जेन्टिनाले विश्वकप फुटबलमा ३२ वर्षपछि पहिलो खेलमै हार ब्यहोरेको थियो । यसअघि सन् १९९० को विश्वकपमा अर्जेन्टिना पहिलो खेलमै पराजित भएको थियो । त्यतिबेला अफ्रिकी टोली क्यामरुनले अर्जेन्टिनालाई १-० गोलले हराएको थियो । तर त्यतिबेला अर्जन्टिना पछि फाइनलसम्म पुगेको थियो ।
यस्तै अर्जेन्टिनाले विश्वकपका खेलमा सुरुवाती अग्रता लिएर हार ब्यहोरेको ६४ वर्षपछि पहिलोपटक हो। यसअघि सन् १९५८ मा अन्तिमपटक अर्जेन्टिना सुरुवाती अग्रता लिएर पनि पराजित भएको थियो । कतार विश्वकपअघि अर्जेन्टिना शानदार लयमा थियो । उसले ३६ खेलयता हार ब्यहोरेको थिएन र साउदी अरबसँग बराबरी मात्र खेलेको भए अन्तर्राष्ट्रिय फुटबलमा र्सवाधिक खेलको अपराजित यात्राको विश्व कर्ीर्तिमान बराबरी गर्ने थियो ।
यसअघि अर्जेन्टिनाले अन्तिमपटक सन् २०१९ मा ब्राजिलसँग हार ब्यहोरेको थियो कोपा अमेरिकाको सेमिफाइनलमा। यता साउदी अरब भने खराब लयबीच कतार विश्वकप खेल्न पुगेको थियो । साउदी अरबले पछिल्ला १० खेलमा केवल २ जित मात्र हात पार्न सकेको थियो ।
साउदी अरब विश्वकप फुटबलमा एकपटक मात्र समूहगत चरण पार गरेको इतिहास छ । पहिलो सहभागितामै सन् १९९४ मा साउदी अरब प्रिक्वाटरफाइनलसम्म पुगेको थियो । त्यसपछिका लगातार तीन संस्करणमा सहभागी भएपनि पहिलो चरण पार गर्न सकेको थिएन।
सन् २०१० र २०१४ को विश्वकपमा छनोट हुन नसकेको साउदी अरबले सन् २०१८ को सहभागितामा एक जित हात पारेपनि फेरी पहिलो चरण पार गर्न सफल भएन । अब समूहमा अर्जेन्टिना र साउदी अरब दुवैले पोल्यान्ड र मेक्सिकोसँग खेल्नेछन् ।
यस्तै, कतारमा जारी फिफा विश्वकप २०२२ अन्तर्गत समूह ‘डी’ को पहिलो खेलमा डेनमार्क र ट्युनिसियाले गोलरहित बराबरी खेलेका छन् । मङ्गलवार एडुकेसन सिटी स्टेडियममा सम्पन्न खेलमा दुवै टिमले गोल गर्ने थुप्रै अवसरहरू सृजना गरेका थिए । तर, फिनिसिङमा चुक्दा दुवै टिमले समूह ‘डी’ मा अंक बाँडेका हुन् । पहिलो हाफमै डेनमार्कले पहिलो हाफमा र दोस्रो हाफमा एक/एक गोल गरेको थियो तर, अफसाइड हुँदा रेफ्रीले मान्यता दिएनन् ।
डेनमार्क र ट्युनिसिया विश्वकपमा पहिलो पटक आमने सामने भएका हुन् । यसअघि, २० वर्ष अगाडी प्रतिस्पर्धा गर्दा डेनमार्कले २-१ गोलको नतिजामा पराजित गरेको थियो । डेनमार्क अफ्रिकन टिमसँग विश्वकपमा आजसम्म पराजित हुन परेको छैन । यस्तै, ट्युनिसियाले यसअघि विश्वकपमा युरोपियन टिमसँग प्रतिस्पर्धा गरेको थिएन ।
यो डेनमार्कको फिफा विश्वकपमा छैटौँ पटक सहभागिता हो र सन १९९८/२००२ पछि लगातार दुइ पटक छनोट भएको यो पहिलो पटक हो । समूह चरण अन्तर्गत आफ्नो दोस्रो खेलमा डेनमार्कले शनिवार फ्रान्ससँग प्रतिस्पर्धा गर्नेछ भने, ट्युनिसियाले शनिवार नै अष्ट्रेलियासँग खेल्नेछ ।
