तनहुँ-१ उपनिर्वाचन : एमाले तनहुँद्वारा निर्वाचन परिचालन कमिटी गठन
भञ्ज्याङ न्यूज
आगामि वैशाख १० गते हुने तनहुँ-१ को प्रतिनिधिसभा सदस्यको उपनिर्वाचनका लागि नेकपा (एमाले) तनहुँले निर्वाचन परिचालन समिति गठन गरेको छ । पार्टी कार्यालय दमौलीमा आइतबार बसेको क्षेत्रीय समन्वय कमिटीको बैठकले केन्द्रीय सदस्य तथा तनहुँ जिल्ला सह-इन्जार्च भगवती न्यौपानेको संयोजकत्वमा १ हजार ५ सय सदस्यीय निर्वाचन परिचालन कमिटी गठन गरेको हो ।
उक्त कमिटीमा सम्बन्धित क्षेत्रका जिल्ला कमिटीका पदाधिकारीहरु, जिल्ला कमिटीका सदस्यहरु, गाउँ तथा नगरकमिटीका पदाधिकारी तथा सदस्यहरु, जनवर्गीय संगठनका पदाधिकारी तथा सदस्यहरु एवं पार्टीबाट निर्वाचित जनप्रतिनिधिहरु सदस्य रहने बताइउको छ । कमिटीले निर्वाचन परिचालन सम्बन्धी सम्पूर्ण काम गर्ने जिल्ला कमिटीका उपाध्यक्ष एवं क्षेत्रीय समन्वय कमिटीका संयोजक हरिराज कडेंलले बताए।
एमालेले निर्वाचन प्रचारको लागि पार्टी अध्यक्ष केपी शर्मा ओलीको प्रमुख आतिथ्यतामा बैशाख १ गते बन्दिपुरमा पालिका स्तरको र बैशाख ५ गते दमौलीमा क्षेत्रीय स्तरको चुनावी सभा आयोजना गर्ने निर्णय गरेको छ । अभियानको क्रममा पार्टीका पदाधिकारी लगायतका नेताहरुले सबै पालिका स्तरको सभालाई सम्बोधन गर्ने केन्द्रीय सदस्य न्यौपानेले बताईन् ।
उक्त बैठकलाई सम्बोधन गर्दै एमाले स्थायी कमिटीका सदस्य किरण गुरुङले उपनिर्वाचनको परिणामलाई एमालेको पक्षमा पार्ने गरी सबै कार्यकर्ता एकताबद्ध भएर खटिन आग्रह गरे । बैठकलाई पोलिट्व्युरो सदस्य टुकराज सिग्देल, केन्द्रीय सदस्य भगवती न्यौपाने, केन्द्रीय सल्लाहाकार एकबहादुर राना, प्रदेश सचिवालय सदस्य केदार सिग्देल लगायतले आ-आफ्नो विचार व्यक्त गरेका थिए।
