विविध कार्यक्रम गरी तनहुँमा गणतन्त्र दिवस मनाइयो
भञ्ज्याङ समाचारदाता/तनहुँ
गणतन्त्र दिवसको अवसरमा तनहुँमा विविध कार्यक्रम गरिएको छ । दिवसका अवसरमा जिल्लाको १० वटै पालिका तथा अन्य निकायहरुले सरसफाई, स्वास्थ्य शिविर तथा विरामीहरुलाई फलफूल वितरण लगायतका कार्यक्रम गरिएको छ ।
दमौलीमा सोमबार सरसफाई तथा स्वास्थ्य शिविर आयोजना गरिएको छ । जिल्ला प्रशासन कार्यालय तनहुँको आयोजना तथा व्यास नगरपालिका, स्वास्थ्य कार्यालयको संयोजनमा सरसफाई तथा स्वास्थ्य शिविर गरिएको हो । सरसफाईमा जनप्रतिनिधि, कर्मचारी, सेना, प्रहरीको सहभागिता रहेको थियो ।
यस्तै स्वास्थ्य शिविरमा दुइ सय लाभान्वित भएका छन् । स्वास्थ्य कार्यालयको संयोजनमा भएको शिविरमा दुइ सय सर्वसाधारणले सेवा लिएको स्वास्थ्य कार्यालय तनहुँका प्रमुख शंकरबाबु अधिकारीले बताए । शिविरमा मधुमेह परीक्षण र उच्च रक्तचापको परीक्षण गरिएको थियो ।
त्यस्तै, बन्दिपुर गाउँपालिकाले बन्दिपुर बजार तथा टुडिखेल लगायतक क्षेत्रमा सरसफाई गरिएको थियो । गाउँपालिकाका अध्यक्ष सुरेन्द्र पाण्डे सहित गाउँपालिकाका कर्मचारी, प्रहरी, स्थानीय बासिन्दाहरुको सहभागितामा सरसफाई गरिएको थियो । तीन दिनसम्म विविध कार्यक्रमको आयोजना गरी तनहुँमा गणतन्त्र दिवस मनाउने कार्यक्रम तय गरिएको छ ।
दिवसको अवसरमा १४, १५ र १६ गते सबै सरकारी तथा गैरसरकारी संस्थामा दिपावली, विद्यालयस्तरीय निबन्ध प्रतियोगिता, आदिकवि भानुभक्त क्याम्पसमा रक्तदान कार्यक्रम आयोजना गरिएको प्रमुख जिल्ला अधिकारी छविलाल रिजालले जानकारी गराए ।