झरीसंगै आएको पहिरोका कारण अवरुद्ध श्रृंगपथ पन्ध्र दिनपछि सञ्चालनमा आयो
भञ्ज्याङ न्यूज
तनहुँको दक्षिण भेगमा पर्ने श्रृंगपथ मोटरमार्ग अन्तर्गत देउराली-सुनाकोट सडकखण्डमा सडक भासिएर अवरुद्ध बनेको सडक पन्ध्र दिनपछि पुनःसञ्चालनमा ल्याइएको छ । अविरल वर्षाका कारण गत असोज २६ गते सडक भासिँदा सवारी साधनको आवागमन अवरुद्ध भएपछि नयाँ ट्रयाक खोलेर शुक्रबारदेखि सवारी पुनः सञ्चालनमा ल्याइएको हो ।
अविरल वर्षाले जिल्लाको घिरिङ गाउँपालिका-५ देउराली नजिकको सडकमा पहिरो जाँदा तनहुँको ऋषिङ, घिरिङ गाउँपालिकासहित स्याङ्जा, पाल्पा र नवलपरासी जिल्लामा गुड्ने सवारी साधन रोकिएका थिए ।
सडक अवरुद्ध भएपछि यताको गाडी यतै र उताको गाडी उतै रोकिएकाले केही दूरी हिँडेर यात्रुले पुनः बस चढेर यात्रा गर्न बाध्य भएको घिरिङ गाउँपालिकाका प्रेस सल्लाहकार अन्जान परियारले बताए । दैनिक माथिबाट सडकमा पहिरो खसेकाले दुइदेखि तीन वटासम्म डोजर प्रयोग गरी माथिपट्ट िपहरा कटान गरेर नयाँ सडकमार्ग बनाइएको छ ।
गण्डकी प्रदेशले रु २५ लाख बजेट उपलब्ध गराएकाले जिल्लास्थित पूर्वाधार कार्यालयले सडक निर्माणको काम गरिएको बताइएको छ । दसैँको समयमा सवारीसाधान नचलेपछि लामो दूरीको बाटो पैदल हिँडेर आफन्त, इष्टमित्र र मान्यजनको हातको टीका थाप्न जान सर्वसाधारणले कठिनाइ भोग्नुपरेको थियो।
सडक बनेपछि साना तथा ठूला सवारीसाधान पनि निर्वाधरुपमा सञ्चालन हुन थालेको भिमाद नगरपालिकाका नगरप्रमुख दधिराज सुवेदीले बताए । दसैँको समयमा अविरल वषर्ा भएका कारण पनि तत्काल काम गर्न नसकिएकाले केही समय ढिलाइ हुन गएको उनले बताए ।
चार्डपर्वको समयमा यात्रुको समस्यालाई मध्यनजर गरी तत्कालका लागि यताको सवारी यतै र उताको सवारी उतै रहने व्यवस्था मिलाइ यात्रुलाई गन्तव्यसम्म पुग्ने व्यवस्था मिलाइएको घिरिङ गाउँपालिकाका अध्यक्ष हेमबहादुर थापाले बताए ।
