तनहुँको आँबुखैरेनीमा सवारी दुर्घटना : धादिङका तामाङको मृत्यु
भञ्ज्याङ न्यूज
पृथ्वीराजमार्ग अन्तर्गत तनहुँको आँबुखैरेनी गाउँपालिका-१ बरादीमा आइतबार दिउँसो भएको सवारी दुर्घटनामा परी एक जनाको घटनास्थलमै मृत्यु भएको छ ।
मुग्लिनबाट डुम्रेतर्फ आउँदै गरेको ग२ख १२३५ नम्बरको बसमा सोही दिशाबाट आउँदै गरेको बाप्र०२-०१५प ६२३६ नम्बरको मोटरसाइकल ठक्कर खाँदा मोटरसाइकल चालकको घटनास्थलमै मृत्यु भएको तनहुँ प्रहरीले जनाएको छ ।
उक्त दुर्घटनामा परी मोटरसाइकल चालक धादिङको साविक सेमजोङ गाविस वडा नम्बर ३ हाल कायम नेत्रावती डबजोङ गाउँपालिका-४ बस्ने २७ वर्षीय सागर तामाङको मृत्यु भएको जिल्ला प्रहरी कार्यालय तनहुँका प्रहरी नायब उपरिक्षक मोहनबहादुर खाँणले जानकारी दिए ।
दुर्घटनामा मोटरसाइकलको पछाडि सवार धादिङको नेत्रवती डबजोङ गाउँपालिका-२ बस्ने २७ वर्षीय सुरेन तामाङ घाइते भएका छन् । उनको आँबुखैरेनी अस्पतालमा उपचार भइरहेको प्रहरीले जनाएको छ । दुवै सवारी साधन र बस चालक प्रहरी नियन्त्रणमा छन् ।
