व्यासमा सांस्कृतिक सम्पदा खोजी र संरक्षण अभियान : पुरातात्विक सम्पदा एवं ग्रामीण पर्यटन मेलाको तयारी

दमौली : व्यास नगरपालिकाभित्रका सांस्कृतिक तथा पुरातात्विक सम्पदाको खोज, पहिचान, अध्ययन, अभिलेखीकरण र संरक्षण गर्ने उद्देश्यले वडास्तरमा जनचेतनामूलक कार्यक्रम सञ्चालन गरिएको छ ।

व्यास नगर प्रज्ञा प्रतिष्ठानको आयोजनामा व्यास नगरपालिका–९ र १३ मा सांस्कृतिक सम्पदाको खोज तथा अध्ययन अनुसन्धान सम्बन्धी वडास्तरीय कोणसभा सम्पन्न भएका छन् । आगामी मंसिर २५ देखि २७ गतेसम्म जिल्ला सभाहलमा आयोजना हुने ‘व्यास पुरातात्विक सम्पदा एवं ग्रामीण पर्यटन मेला–२०८३’ को पूर्वतयारीस्वरूप कोणसभा आयोजना गरिएको हो ।

वडा नं. ९ को गजौडेस्थित वडा कार्यालयको सभाहलमा वडा अध्यक्ष शुरेश थापाको अध्यक्षतामा भएको कार्यक्रममा प्रतिष्ठानका उपकुलपति काशीनाथ न्यौपानेले स्थानीय संस्कृति, परम्परा र ऐतिहासिक सम्पदाको संरक्षण तथा प्रवद्र्धनमा समुदायको सक्रियता आवश्यक रहेको बताए । मेलाका संयोजक हरिसिं गुरुङले मेलाको उद्देश्य र यसले स्थानीय पर्यटन प्रवद्र्धनमा पुर्याउने योगदानबारे जानकारी गराएका थिए ।

त्यस्तै, वडा नं. १३ को वडा कार्यालयस्थित सभाहलमा कार्यवाहक वडा अध्यक्ष हरिश्चन्द्र पन्थको अध्यक्षतामा कोणसभा सम्पन्न भएको थियो । प्रतिष्ठानका उपकुलपति न्यौपानेको प्रमुख आतिथ्यतामा भएको कार्यक्रमको उद्घाट वडा अध्यक्ष हड्खलेले गरेका थिए । कार्यक्रममा न्यौपानेले स्थानीय संस्कृति र सम्पदाको संरक्षण तथा पुस्तान्तरणको आवश्यकतामाथि जोड दिए ।

संयोजक गुरुङले मेलाको उद्देश्य र महत्वबारे जानकारी गराएक थिए । दुवै कार्यक्रममा प्राज्ञ देवीबहादुर बस्नेतले स्वागत मन्तव्य व्यक्त गरेका थियो भने प्राज्ञ सदस्य महाप्रसाद हड्खलेले सहजीकरण गरेका थिए ।

वडा नं. ९ मा आयोजित कोणसभामा नगर कार्यपालिका सदस्य ज्ञानुमाया सुनार, वडा सदस्य सन्तोष जिसी र उमा आचार्य, महेन्द्र माध्यमिक विद्यालयका प्रधानाध्यापक अमृतबहादुर थापा, सरस्वती प्राथमिक विद्यालयका प्रधानाध्यापक जोहर अलि मियालगायतको सहभागिता थियो ।

त्यस्तै, वडा नं. १३ को कार्यक्रममा जनजागृति माध्यमिक विद्यालयका प्रधानाध्यापक तीर्थ बर्देवा, सिद्धबेनी माध्यमिक विद्यालयका प्रधानाध्यापक रोदन थापालगायत शैक्षिक संस्था, आमा समूह, टोल विकास संस्था तथा विभिन्न सामुदायिक संस्थाका प्रमुख र प्रतिनिधिहरू सहभागी थिए ।

वडास्तरमा स्थानीय समुदायसँग छलफल गरी संस्कृति र सम्पदाको पहिचान तथा संरक्षणमा जनसहभागिता बढाउने प्रतिष्ठानको उद्देश्य छ । यस्ता कार्यक्रमले ओझेलमा परेका ऐतिहासिक, धार्मिक, सांस्कृतिक तथा पुरातात्विक सम्पदाको खोजी र अभिलेखीकरणमा सहयोग पुग्ने अपेक्षा गरिएको छ । साथै, पहिचान भएका सम्पदालाई ग्रामीण पर्यटनसँग जोडेर स्थानीय क्षेत्रको पर्यटन प्रवर्द्धन गर्ने लक्ष्य मेलाले राखेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर