आँबुखैरेनी -१ स्थित मित्रता सहकारीको १२औं वार्षिक साधारणसभा सम्पन्न

तनहुँको आँबुखैरेनी गाउँपालिका-१ सत्रसयफाँट स्थित मित्रता बचत तथा ऋण सहकारी संस्थाले १२औं वार्षिक साधारण सभा बुधबार सम्पन्न गरेको छ ।

सहकारीको साधारणसभामा आँबुखैरेनी गाउँपालिका-१ का वडाध्यक्ष प्रेमबहादुर गुरुङले संविधान दिवसको अवसरमा संस्थाले वार्षिक साधारण सभा गरेकोमा आभार ब्यक्त गर्दै संविधानले र्सार्थकता पाओस् भन्दै शुभकामना व्यक्त गरे ।

सहकारीका अध्यक्ष रामचन्द्र कँडेलको सभापतित्वमा आयोजित कार्यक्रममा सहकारीले ज्येष्ठ नागरिकलाई सम्मान, विद्यार्थीलाई छात्रवृत्ति, इमानदार सदस्य र कर्मचारीलाई पुरस्कृत एवं सम्मान गरेको थियो ।

कार्यक्रममा गोरखा पालुङटार-८ का वडा अध्यक्ष होपबहादुर नेपाली, शेयर सदस्य बाबुराम नेपाली लगायतकाले शुभकामना व्यक्त गरेका थिए भने संस्थाका अध्यक्ष कँडेलले वार्षिक प्रगति प्रतिवेदन प्रस्तुत गरेका थिए ।

संस्थाका कोषाध्यक्ष ऋषिराम अधिकारीले आर्थिक प्रतिवेदन, उपाध्यक्ष सरस्वती खनालले स्वागत गरेका थिए भने संस्थाका सल्लाहकार अगम अधिकारीले सहजिकरण गरेका थिए । संस्थाले वाषिर्क साधारण सभाका अवसरमा ज्येष्ठ नागरिक ९६ वर्षीया रत्नमाया सार्की, ७३ वर्षीया विष्णुमायाँ न्यौपाने र गणेशमान श्रेष्ठलाई सम्मन गरिएको थियो ।

असल बचतकर्ता, असल ऋणी, उत्कृष्ठ कर्मचारी रचना थापा, मित्रता माविमा एसइइ २०७९ मा उत्कृष्ट अंक प्रप्त गर्ने शेयर सदस्यका छोराछोरी ३ जना विद्यार्थीलाई ५ हजारका दरले छात्रवृत्ति प्रदान गरिएको लेखा समितिका संयोजक रविन्द्र अधिकारीले जानकारी दिए ।

संस्थाको २९९ शेयर सदस्य छन् । शेयर पूँजि २ करोड २३ लाख ४० हजार ६ सय समेत कूल पूँजि ११ करोड ६८ लाख ४ हजार ४ सय रहेको बताइएको छ । संस्थाले दैनिक बचत, मासिक बचत, विशेष बचत, बाल बचत, ज्येष्ठ नागरिक बचत, महिला बचत, मुद्दती तर्फ बार्षिक र अर्ध वार्षिक बचत लगायतका सेवा प्रवाह गर्दै आएको सहकारीकी ब्यवस्थापक रचना थापाले बताइन् ।