रास्वपाले संसद्मा रचनात्मक प्रतिपक्षको भूमिका निर्वाह गर्दै आएको छ : सांसद वाग्ले

राष्ट्रिय स्वतन्त्र पार्टी (रास्वपा)का कार्यवाहक सभापति एवं सांसद डा स्वर्णिम वाग्लेले संसद्मा रचनात्मक प्रतिपक्षको भूमिका निर्वाह गर्दै आएको बताएका छन् । तनहुँ उद्योग वाणिज्य संघको १७औं महाअधिवेशनबाट निर्वाचित नयाँ कार्यसमितिलाई शनिबार दमौलीमा पदस्थापन गराउँदै उनले रास्वपा अब सदन र सडक दुबैमा क्रियाशिल हुने बताए ।

‘हामी संसद्मा विभिन्न विधेयक दर्ता गर्र्छौ तर अहिलेको प्रणालीले बहुमतका आधारमा ती विधेयक फेल हुने गरेका छन् । त्यस्ता विधेयकहरू जनताका माझ लगेर यो ठीक छ वा छैन भनेर सोध्छौं’, उनले भने, ‘राजनीतिलाई सङ्ल्याउँदै विकृति र विसङ्गति हटाउनेतर्फ सबै लाग्नुपर्छ । त्यसका लागि राजनीतिक दल नै जिम्मेवार बन्नुपर्ने बेला आएको छ ।’

मुलुकको वर्तमान अवस्थाका विषयमा चर्चा गर्दै उनले मुलुक बन्छ भन्ने आशा जगाउनुपर्ने आवश्यकता रहेको बताएका छन् । उनले भने, ‘अहिले युवापुस्तामा नेपालमा केही हुँदैन भन्ने निराशा पैदा भएको छ । निराशाले मुलुक समृद्ध नहुने भएकाले आशाको किरण जगाउनुपर्ने बेला आएको छ ।’

‘सधैं निराशाका कुरा गरेर मात्र हुँदैन । मुलुकलाई समृद्ध बनाउन सकिन्छ, त्यसका लागि सबै आशावादी बन्नुपर्छ’, सांसद वाग्लेले भने, ‘देशभरका अलपत्र विकास योजनामा पनि रास्वपाले खबरदारी गर्ने नीति लिएको छ । अर्थतन्त्रलाई सही मार्गमा ल्याउनुपर्ने आवश्यकता छ । सार्वजनिक खर्चमा देखिएको शिथिलतालाई समाधान गर्नुपर्छ ।’

उक्त कार्यक्रममा जिल्ला समन्वय समितिका प्रमुख शान्तिरमण वाग्लेले जिल्लामा लगानीका वातावरण भित्र्याउनेतर्फ लाग्नुपर्नेमा जोड दिए । म्याग्दे गाउँपालिकाका अध्यक्ष श्रीप्रसाद श्रेष्ठले राष्ट्रियताको भावना विकास भएमात्रै मुलुक बन्न सक्ने चर्चा गर्दै निराशाका कुरा होइन आशाको कुरा र काम गर्नुपर्ने समय आएको बताए ।

यस्तै, संघको १७औं महाअधिवेशनबाट निर्वाचित पदाधिकारीलाई पदस्थापन गराइएको छ । संघको कार्यालयमा आयोजित कार्यक्रममा नवनिर्वाचित अध्यक्ष वैकुण्ठनाथ मिश्रलाई निवर्तमान अध्यक्ष पविन्द्रकुमार श्रेष्ठले शपथग्रहण गराएका छन् ।

त्यस्तै मिश्रले नवनिर्वाचित पदाधिकारी तथा सदस्यहरुलाई शपथग्रहण गराएका थिए । सोही अवसरमा निवर्तमान अध्यक्ष श्रेष्ठले नवनिर्वाचित अध्यक्ष मिश्रलाई माइन्युट हस्तान्तरण गरेका छन् ।

कार्यक्रममा नवनिर्वाचित अध्यक्ष वैकुण्ठनाथ मिश्रले संस्थाको गरिमालाई अझ उचो बनाउने प्रतिबद्धता जनाउँदै व्यवपारी व्यवसायिको हक हितका विषयमा लागि पर्ने बताए ।

यस्तै, नवनिर्वाचित कार्यसमितिको शनिबार बसेको पहिलो बैठकबाट महासचिवमा सुबोध अधिकारी, सचिवमा शिव ओम मल्ल, सह-कोषाध्यक्षमा प्रकाशचन्द्र हड्खले, महिला सदस्यमा शकुन्तला आलेलाई मनोनित गरिएको संघका अध्यक्ष मिश्रले जानकारी गराए ।