व्यासको राम्चे चेपाङ बस्तिमा निःशुल्क स्वास्थ्य शिविर
भञ्ज्याङन्यू
तनहुँको व्यास नगरपालिका-११ स्थित राम्चे ओडारेको चेपाङ बस्तिमा निःशुल्क स्वास्थ्य शिविर सम्पन्न गरिएको छ । रोटर्याक्ट क्लब अफ दमौलीले शनिवार समाधान हस्पिटल प्रालि, दमौली आँखा अस्पताल, ए वान डेन्टल क्लिनिक तथा व्यास डाइग्नोष्टिक प्रालि र रोटर्याक्ट त्रिभुवन युनिभर्सिटीको प्राविधिक सहयोग तथा व्यास नगरपालिकाको सहयोगमा शिविर सञ्चालन गरेको हो ।
स्वास्थ्यको सहज पहुँचबाट टाढा रहेका दुर्गम बस्तिमा हरेक वर्ष एक स्वास्थ्य शिविर आयोजना गर्ने योजना अनुसार रोटर्याक्टले दुर्गम चेपाङ बस्तीमा निःशुल्क स्वास्थ्य शिविर आयोजना गरेको क्लबका अध्यक्ष अनुज बिमलीले बताए ।
शिविरबाट चेपाङ बस्तीका ११२ जना लाभाविन्त भएका छन्। सो अवसरमा जेनेरल फिजिसियन, आखाँ रोग विशेषज्ञ र दातँ सम्बन्धी विशेषज्ञद्धारा सेवा प्रदान गरिएको उनले बताए । शिविरमा स्वास्थ्य परिक्षणका साथै निःशुल्क औषधी पनि प्रदान गरिएको थियो । साथै शिविरमा निःशुल्क सुगर परीक्षण र ब्लड गुप्र पहिचान समेत गरिएको अध्यक्ष बिमलीले बताए ।
क्लबले “एक घर, एक फर्स्ट एड किट अभियान” भन्ने नाराका साथ ४६ परिवारलाई प्रथामिक उपचार सामग्री हस्तान्तरण गरिएको क्लबका सचिव उमेश पौडेलले जानकारी दिए । चेपाङ परिवार, एक विद्यालय र स्थानीय चर्चलाई प्रथामिक उपचार किट सहयोग गरिएको पौडेलले बताए।
स्वास्थ्य संस्थाको पहुँचबाट टाढा रहेको बस्तिमा सामान्य उपचारको अभाव नहोस् भन्ने उद्देश्यले प्रथामिक उपचार किट हस्तान्तरण गरिएको अध्यक्ष बिमलीले बताए । प्रथामिक उपचारको महत्व र आवश्यकता बुझाउन पनि प्रथामिक उपचार सामग्री सहयोग अभियान सुरु गरिएको उनले बताए ।
शिविरमा व्यास नगरपालिकाका प्रमुख बैकुण्ठ न्यौपानेले चेपाङ समुदाय चेतनाको स्तरमा धेरै पछाडी रहेकाले उनीहरुको स्वास्थ्य, शिक्षा लगायतका आधारभूत आवश्यकतामा पहुँच बढाउन सहयोग गर्ने बताए ।
