भानु नगरस्तरीय प्रथम मेयर कप फुटबल प्रतियोगिताको उपाधि वडा नं. २ ले जित्यो

तनहुँको भानु नगरपालिकामा आयोजित भानु नगरस्तरीय प्रथम मेयर कप नाइन ए साइड फुटबल प्रतियोगिताको उपाधि वडा नं २ ले जितेको छ । भानु-१ भन्सार स्थित भानु क्षेत्रीय रङ्गशालामा शनिबार भएको फाईनल खेलमा निर्धारित समय अवधिभर कुनैपनि गोल नभएपछि खेल पेनाल्टि सुट आउटमा ४-२ को गोल अन्तरले वडा नं. २ ले उपाधि जित्न सफल भएको हो ।

शनिबारै भएको पहिलो सेमीफाईनलमा वडा नं २ ले वडा नं ३ लाई हराएपछि वडा नं २ ले फाईनलको यात्रा तय गरेको थियो भने उप-विजेता भानु-१ ले वडा नं ११ लाई हराउँदै फाईनलमा पुगेको थियो ।

च्याम्पियन बनेसंगै वडा नं २ ले ५० हजार रुपैयाँको साथमा रनिङशिल्ड, ट्रफि, मेडल र प्रमाण-पत्र प्राप्त गरेको छ भने उप-विजेता वडा नं १ ले ३५ हजार रुपैयाँको साथमा ट्रफि, मेडल र प्रमाण-पत्र प्राप्त गरेको भानु नगरपालिकाका शिक्षा तथा खेलकूद विकास शाखा प्रमुख धु्रबराज पौडेलले बताए ।

यस्तै, सेमिफाइनलमा पुग्न सफल वडा नं ३ र वडा नं ११ ले नगद १०/१० हजार रुपैयाँ पुरस्कार प्राप्त गरेका छन् । सर्वोत्कृष्ट खेलाडी वडा नं २ का सुनिल मजकोटी, र्सवाधिक गोलकर्ता वडा नं २ का कर्म गुरुङ र वडा नं ७ का रबिन नेपाली, उत्कृष्ट डिफेन्डर वडा नं १ का सलिन तामाङ, उत्कृष्ट गोल रक्षक रमेश श्रेष्ठलाई पुरस्कार प्रदान गरिएको शिक्षा शाखाकी अधिकृत सरस्वती गुरुङ ढकालले जानकारी गराइन् ।

विजेतहरुलाई पुरस्कृत गर्दै भानुका नगरप्रमुख आनन्दरनज त्रिपाठीले राष्ट्रिय खेलाडि उत्पादन गर्न स्थानीय क्लबहरुको महत्वपूर्ण भूमिका रहने बताए । उनले खेलका गतिविधिहरु संचालन गर्न पालिकाले सहयोग गर्दै आईरहको र आगामी दिनहरुमा पनि सहयोग गर्ने प्रतिबद्धता ब्यक्त गर्नु भयो ।

खेलकूद बिकास समितिका संयोजक एवं वडा नं. ३ का अध्यक्ष तुलकुमार गुरुङको सभापतित्वमा आयोजित कार्यक्रममा नगर उपप्रमुख उमा गोतामे, वडा नं १० का अध्यक्ष एवं सामाजिक बिकास समितिका अध्यक्ष हरिहर उप्रेती, आर्थिक समितिका संयोजक एवं वडा नं. ४ का अध्यक्ष अर्जुन बोहरा, वडा नं १ की अध्यक्ष कान्छिमायाँ तामाङ, २ का अध्यक्ष केशवराज त्रिपाठी, वडा नं. ५ का अध्यक्ष नहकुल अधिकारी, इलाका प्रहरी कार्यालय भानुका प्रमुख प्रहरी निरीक्षक शुसिल घिमिरे, कार्यपालिकाका सदस्यहरु, विभिन्न राजनितिक दलका नेताहरु, विभिन्न संघसंस्थाका प्रमुख तथा प्रतिनिधिहरु लगायतले शुभकामना व्यक्त गरेका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर