नाबालिगलाई जबरजस्ती करणी गरेको अभियोगमा ४ जना पक्राउ
नबालिगलाई जबरजस्ती करणी गरेको अभियोगमा ४ जना पक्राउ परेका छन् । ज.ज.कको अभियोगमा भिमाद नगरपालिकाबाट ३ र देवघाट गाउँपालिकाबाट एक गरी ४ जनालाई पक्राउ गरिएको प्रहरीले जनाएको छ ।
जिल्ला प्रहरी उपरीक्षक अपिल बोहोराका अनुसार १४ वर्षीया बालिकालाई जबरजस्ती करणी गरेको अभियोगमा भिमाद–५ वाङटेङटारका ४३ वर्षीय चित्रबहादुर कामी र २६ वर्षीय सुबिन्द्र कामीलाई पक्राउ गरिएको छ । गत असार १५ गते ती बालिकालाई जबरजस्ती करणी गरेको भन्ने उजुरीका आधारमा उनीहरुलाई पक्राउ गरिएको प्रहरीले जनाएको छ ।
पीडितका वुबाले इलाका प्रहरी कार्यालय बेलचौतारामा लिखित निवेदन दिएपश्चात प्रहरी निरीक्षक गणेश सुवेदिको कमाण्डमा ५ जनाको टोलीले उनीहरुलाई म्याग्दे गाउँपालिका–३ धयरेबाट लुमिछिपी बसिरहेको अबस्थामा पक्राउ गरेको बताइएको छ ।
यस्तै, १३ वर्षीया बालिकालाई जबरजस्ती करणी गरेको अभियोगमा भिमाद–८ राङरूङका करिव ३० वर्षीय बिरेन्द्र परियार पक्राउ परेका छन् । गत २५ गते परियारले ती बालिकालाई आफ्नै मकै बारीमा जबरजस्ती करणी गरेको भन्ने उजुरीको आधारमा इलाका प्रहरी कार्यालय भिमादबाट खटिएको प्रहरीले परियारलाई उनकै घरबाट नियन्त्रणमा लिएको छ । यस सम्बन्धमा थप अनुसन्धन भइरहेको जिल्ला प्रहरी कार्यलयले बताएको छ ।
यसैगरी १२ वर्षीया बालिकालाई जबरजस्ती करणी गरेको अभियोगमा देवघाट–२ देउपुरका २२ वर्षीय ईश्वर थापा मगरलाई प्रहरीले पक्राउ गरेको छ । आफ्नो बास्तविक परिचय गोप्य राखी वीर अस्पतालमा कार्यरत रहेको भनी अनुचित प्रभावमा पारी बालिकालाई गत जेठ ५ गते जबरजस्ती करणी गरेको अभियोगमा ईश्वरलाई देवघाट–२ बाट पक्राउ गरिएको प्रहरीले बताएको छ ।
पक्राउ परेकाहरुलाई जबरजस्ती करणी सम्बन्धी मुद्दामा तनहुँ जिल्ला अदालतबाट म्याद थप गरी थप अनुसन्धान भईरहेको जिल्ला प्रहरी कार्यालयले जनाएको छ ।
