भीमादको क्याम्पस रोड, लखन चोक, पुरानो बजार, बागटार चोक, मालेबगर क्षेत्रमा लकडाउन
भञ्ज्याङ समाचारदाता (भीमाद)
भीमाद नगरपालिकाको वडा नं. ६ को क्याम्पस रोडमा समुदायमा कोरोना भाइरसको संक्रमण देखिएपछि नगरपालिकाले वडा नं. ६ र ७ को बजार क्षेत्रमा लकडाउन जारी गरेको छ ।
वडा नंं. ६ र ७ को समुदायको भीडभाड हुने मुख्य क्षेत्र भएका हुनाले बजार क्षेत्रमा कन्ट्याक्ट ट्रेसिङ गरी संक्रमणको पहिचान एवं जोखिम न्यूनिकरण गर्नका लागि लकडाउन जारी गरिएको नगरपालिकाका प्रमुख प्रशासकीय अधिकृत थमनसिंह थापाले जानकारी गराए ।
नगरपालिकाको र्सवपक्षीय बैठकले आज शनिबार साँझ ५ बजेदेखि असोज २२ गतेसम्मका लागि वडा नं. ६ को पुरै क्षेत्र र वडा नं. ७ को भीमाद प्रवेश गर्ने नाका पुलको मुखदेखि पेट्रोल पम्प हुँदै बागटार क्षेत्रमा अत्यावश्यक सेवा बाहेकका सबै क्षेत्र बन्द गर्ने निर्णय गरेको छ ।
नगरपालिकाले एक सूचना जारी गर्दै क्याम्पस रोड (जनज्योति चोकदेखि बसपार्क चोकसम्म), लखन चोकदेखि कुमार चोकसम्म, पुरानो बजारदेखि पेट्रोल पम्पसम्म, बागटार चोक र मालेबगर क्षेत्रलाई लकडाउन गरिएको र यी क्षेत्रका बासिन्दालाई स्वाब टेष्टमा आवश्यक सहयोग गर्न आग्रह गरेको छ ।
यस्तै, भिमाद बजारबाट अन्य पालिकाहरुमा जाने अत्यावश्यक सवारी साधानहरु भिमाद बजार क्षेत्रमा नरोकिइकन आ-आफ्नो क्षेत्रतर्फजान नगरपालिकाले अनुरोध गरेको छ ।
अत्यावश्यक काममा बाहेक घरबाट ननिस्कन, घर बाहिर निस्कनै पर्ने भएमा अनिवार्य रुपमा मास्क लगाउने र समुहमा नहिड्ने, भौतिक र सामाजिक दुरी कायम गर्न नगरपालिकाले नगरबासीसंग आग्रह गरेको छ ।
भिमादमा शनिबार ६ नम्बर वडामा २७ वर्षा व्यक्ति र वडा नं. २ मा ५ वर्षा बालिकामा संक्रमण भेटिएको छ ।
