सत्यवती माविमा पाँच लाखको अक्षयकोष स्थापना
- भञ्ज्याङ समाचारदाता (दमौली)
तनहुँको व्यास नगरपालिका-३ दमौलीका ज्येष्ठ नागरिक राजकुमार श्रेष्ठले दमौली स्थित सत्यवती माध्यमिक विद्यालयमा अक्षयकोष स्थापना गरेका छन् । श्रेष्ठले विद्यालयमा पाँच लाख रुपैयाँको अक्षयकोष स्थापना गरेका हुन् ।
श्रेष्ठले सत्यवती माध्यमिक विद्यालयमा अध्ययनरत विद्यार्थीहरुलाई छात्रवृत्ति प्रदान गर्ने प्रयोजनका लागि आफ्नो ८४ वर्षको जन्मदिनका दिन विद्यालयलाई तीन लाख रुपैयाँ हस्तान्तरण गरी पाँच लाख रुपैयाँको अक्षयकोष स्थापना गरेका हुन् । दुइ लाख रुपैयाँबाट स्थापन भएको कोषमा हाल तीन लाख थप गरी पाँच लाख रुपैयाँ पुगेको विद्यालयका प्रधानाध्यापक इन्द्रप्रसाद पौडेलले बताए ।
श्रेष्ठका छोरा सान्तकुमार र बुहारी इन्द्रकलाले संयक्त रुपमा विद्यालयका प्रधानाध्यापक इन्द्रप्रसाद पौडेल र विद्यालय व्यवस्थापन समितिका अध्यक्ष सूर्य अधिकारीलाई रकम हस्तान्तरण गरेका थिए ।
उक्त रकम दमौली स्थित शुभश्री बचत तथा ऋण सहकारी दमौलीमा राजकुमार श्रेष्ठ छात्रवृत्ति कोष को नाममा जम्मागरिएको र त्यस बापत प्राप्त व्याजले गरिब तथा जेहेन्दार विद्यार्थीलाई छात्रवृत्ति प्रदान गरिने विद्यालयले जनाएको छ ।
