दमौलीस्थित व्यास क्षेत्रमा गंगा आरती शुभारम्भ
दमौली : तनहुँको दमौलीस्थित व्यास क्षेत्रको धार्मिक प्रचारप्रसार एवं वैदिक सनातन धर्मको रक्षा गर्ने उद्देश्यले व्यास गुफामा गंगा आरती सुरू गरिएको छ । वेदानुयायी प्रतिष्ठान नेपाल केन्द्रीय कार्यालयको आयोजना तथा व्यास–३ को आर्थिक सहयोगमा शुक्ला माहेन्द्री गंगा आरती प्रारम्भ गरिएको हो ।
गंगा आरतीको प्रारम्भ कार्यक्रममा व्यास नगरपालिकाका नगरप्रमुख वैकुण्ठ न्यौपानेले गंगा आरतीले व्यास क्षेत्रको प्रचारप्रसारमा सहयोग पुग्ने बताए। उनले सबैको साथ र सहयोगबाट व्यास क्षेत्रमा विकास निर्माण एवं प्रचारप्रसार गर्न सहयोग पुग्ने बताए ।
वेदानुयायी प्रतिष्ठान नेपाल केन्द्रीय अध्यक्ष कृष्णकान्त काफ्लेको अध्यक्षतामा आयोजित कार्यक्रममा शान्ति स्वरूपानन्द दामोदर बाबा, व्यास अध्ययेता काशीनाथ न्यौपाने, व्यास नगरपालिकाका प्रथम नगरप्रमुख ताराप्रसाद श्रेष्ठ, भारतबाट आएका सन्त प्रेमानन्द यति, जिल्ला समन्वय समिति तनहुँका पूर्व उपप्रमुख पवित्रा पौडेल, व्यास–३ का वडाध्यक्ष अनुप राना, व्यास–३ का वडा सदस्य दघिराज घिमिरे, व्यास क्षेत्र शिवपाञ्चायन विकास कोषका अध्यक्ष प्रेमप्रकाश भट्टराई, वेदानुयायी प्रतिष्ठानका केन्द्रीय सदस्य एवं कास्की जिल्ला अध्यक्ष ऋषिराम त्रिपाठी लगायतले गंगा आरतीलाई निरन्तरता दिन आवश्यक रहेको बताए ।
प्रतिष्ठानका केन्द्रीय उपाध्यक्ष ऋषिराम ढुंगाना स्वागत गरेको कार्यक्रमको सहजिकरण सचिव सत्यप्रसाद खनालले गरेका थिए । तीन जनाले संयुक्त रूपमा दैनिक रूपमा आरती गर्ने व्यवस्था मिलाईएको आयोजकले जनाएको छ ।
मंगलबारको आरतीको लागि व्यास–३ का वडा सदस्य दघिराज घिमिरे छोराको जन्मदिन र आमाको स्मृतिमा गंगा आरतीमा सहयोग गर्ने बताएका छन् । बुधबारको लागि दमौली खानेपानी तथा सरसफाइ उपभोक्ता संस्थाका अध्यक्ष वुद्धिमान श्रेष्ठले सहयोग गर्ने बताइएको छ ।
उक्त गंगा आरतीको लागि व्यास नगरपालिका वडा नं. ३ बाट १ लाख ४० हजार, व्यास नगरपालिकाबाट बत्ति विस्तारका लागि रू १ लाख ५० हजार सहयोग प्राप्त भएको बताईएको छ ।
