तनहुँको ऋषिङ गाउँपालिका अध्यक्ष श्रेष्ठविरुद्ध ज्यान मार्ने उद्योगमा जाहेरी दर्ता
दमौली । तनहुँको ऋषिङ गाउँपालिका अध्यक्ष राजेन्द्रकृष्ण श्रेष्ठविरुद्ध प्रहरीमा जाहेरी दर्ता भएको छ । जग्गा विवादमा एक व्यक्तिलाई कुटपिट गरेको आरोपमा अध्यक्ष विरुद्ध जाहेरी दर्ता भएको बताइएको छ । गाउँपालिका अध्यक्ष श्रेष्ठले घरमा बोलाएर स्थानीय ५७ वर्षीय प्रभात आलेलाई कुटपिट गरेको आरोप छ ।
भिमादको मालेबगारमा गाउँपालिका अध्यक्ष श्रेष्ठले आले परिवारको जग्गा खरिद गरेका थिए । त्यो जग्गाको विषयमा उनीहरुबीच ७÷८ वर्षदेखि विवाद रहदै आएको बताइएको छ ।
अध्यक्ष श्रेष्ठले सहमति गर्न बोलाएर आफूलाई एक्कासी कुटपिट गरेर ज्यान मार्न खोजेको भन्दै आलेले प्रहरीमा उजुरी दिएको र उक्त जाहेरी दर्ता भएको इलाका प्रहरी कार्यालय बेलचौताराका प्रमुख इन्सपेक्टर पोषण थापाले जानकारी गराए ।
‘जाहेरी दर्ता भएको छ । सुरूको ठाडो उजुरीमा कुटपिट भएकाले क्षतिपूर्ति भराइ पाउँ भन्ने थियो । पछि ज्यान मार्ने उद्योगमा हुलाकमार्फत जाहेरी प्राप्त भयो र दर्ता भयो’, इन्स्पेक्टर थापाले भने , ‘त्यसबारे अध्ययन भइरहेको छ ।’
‘घाउको परीक्षण, घटनाको प्रकृतिबारे अनुसन्धान भइरहेको छ’, इन्सपेक्टर थापाले भने, ‘यो मुद्दालाई कसरी अगाडि बढाउने भनेर हिजोमात्र पनि सरकारी वकिलको कार्यालयमा छलफल भएको छ । अनुसन्धान जारी छ ।’
पीडित भनिएका प्रभात आले र पालिका अध्यक्ष राजेन्द्रकृष्ण श्रेष्ठ दुबै सम्पर्कमै रहेको इन्स्पेक्टर थापाले बताए ।
प्रभात आले २०१५ सालमा तनहुँबाट कांग्रेस सांसद बनेका पदमबहादुरका छोरा तथा गण्डकी प्रदेश सरकारका पूर्वमन्त्रीसमेत रहेका सांसद जीतप्रकाश आलेका भाइ हुन् ।
