दमौली अस्पतालमा दाँतको उपचार गरिने
तनहुँको दमौली अस्पतालमा दन्तसेवाका लागि डिजिटल एक्सरे मेसिन सञ्चालनमा ल्याइएको छ । अस्पतालमा सेवा सुविधा थप गर्ने उद्देश्यबमोजिम दाँतको उपचारका लागि डिजिटल एक्सरे मेसिन सञ्चालनमा ल्याएको हो ।
अस्पतालमा पूर्वाधार थप गर्नका लागि स्वास्थ्य तथा जनसंख्या मन्त्रालयले रकम उपलब्ध गराएपछि डिजिटल एक्सरे मेशिन खरिद गरिएको अस्पताल व्यवस्थापन समितिका अध्यक्ष प्रदीपराज अधिकारीले जानकारी दिनुभयो । उक्त मेशिनलाई करीब रु ५० लाख पर्नेछ ।
वि.सं २०५९ सालमा अस्पतालको रुपमा स्तरोन्नति भएको दमौली अस्पताल उपकरण थप्ने प्रयासमा जुटेको छ । गत महिना मात्रै अस्पतालमा एनेस्थेसिया उपकरण जडान गरिएको थियो। बिना अक्सिजन शल्यक्रिया गर्न सकिने रु २० लाख बराबरको उक्त मेशिन स्वास्थ्य तथा जनसंख्या मन्त्रालयले उपलब्ध गराएको थियो।
