आदिकविमा विद्यार्थी गुणस्तर व्यवस्थापन सर्कल सम्बन्धी अभिमुखीकरण
दमौली : तनहुँको दमौलीस्थित आदिकवि भानुभक्त क्याम्पसको शैक्षिक गुणस्तर विकासका लागि विद्यार्थी गुणस्तर व्यवस्थापन सर्कल सम्बन्धी विद्यार्थी अभिमुखीकरण कार्यक्रम गरिएको छ ।
क्याम्पसमा आयोजित उक्त कार्यक्रममार्फत क्याम्पसले शैक्षिक क्रियाकलापलाई व्यवस्थित, सहज र प्रभावकारी बनाउन, विद्यार्थीको क्षमता विकास गर्न तथा अध्ययनप्रति उत्प्रेरणा जगाउनका लागि हरेक कक्षामा एसक्युएमसी गठन गर्ने निर्णय कार्यान्वयनमा ल्याएको छ ।
स्नातक तहका वार्षिक र सेमेस्टर प्रणाली अन्तर्गतका प्रत्येक कक्षामा एक संयोजक, एक छात्रा र एक सदस्य गरी तीन सदस्यीय सर्कल गठन गरिएको क्याम्पसको एसक्युएमसी निर्देशिकामा उल्लेख गरिएको छ। साथै क्याम्पसस्तरमा एक संयोजक र एक सहसंयोजक रहने व्यवस्था गरिएको क्याम्पस प्रमुख महाप्रसाद हड्खालेले जानकारी गराए ।
सहायक क्याम्पस प्रमुख विश्वेश्वर तिमल्सेनाको अध्यक्षतामा आयोजित कार्यक्रममा सहायक क्याम्पस प्रमुख डा. रामकुमार अधिकारी र बिमल गिरी, व्यवस्थापन विभाग प्रमुख जनक काफ्ले, पब्लिक क्याम्पस प्राध्यापक संघ नेपाल आदिकवि भानुभक्त क्याम्पस इकाइका अध्यक्ष राजन घिमिरे, स्वतन्त्र विद्यार्थी युनियनका अध्यक्ष अनुप आले, सदस्यहरू तथा विभिन्न कक्षागत संयोजक र सदस्यहरूको सहभागिता रहेको थियो ।
सोही अवसरमा बसेको भेलाले वि.बी.एस प्रथम वर्षका विद्यार्थी रामभक्त रानाभाटलाई क्याम्पसको एसक्युएमसी संयोजक र बी.एड दोस्रो वर्ष (गणित समूह) की विद्यार्थी नम्रता श्रेष्ठलाई सह–संयोजकमा चयन गरिएको छ ।
