स्वास्थ्य सेवा सहज बनाउन कांग्रेस तनहुँको माग

नेपाली कांग्रेस तनहुँले कोरोना संक्रमितहरुको उपचार सेवा सहज बनाउन माग गरेको छ । आइतबार भानु-१ का कोरोना संक्रमित एक पुरुषले दमौली अस्पतालमा उपचार सेवा प्राप्त गर्न नसक्दा ज्यान गुमाउनु परेको भन्दै संक्रमितहरुको उपचार सेवा सहज बनाउन माग गरेको हो ।

जिल्ला सचिव विश्वनाथ बास्तोलाले सोमबार एक विज्ञप्ति जारी गर्दै भानु-१ का एक जना कोभड-१९ का विरामीलाई पटक पटक दमौली अस्पतालले तयारी छैन भन्दै भर्ना लिन नमानी २ घण्टासम्म अस्पताल गेटमै अलमल गराइ एम्वुलेन्समै ज्यान गुमाउनु परेको घटनाले सम्पूर्ण तनहुँवासीको स्वास्थ्य असुरक्षाको अवस्था उजागर भएको बताएको छ ।

विज्ञप्तिमा यस्ता गैरजिम्मेवारी कार्यको सम्वन्धित अस्पताल प्रशासन र जिल्ला संकट व्यवस्थापन समितिले आगामी दिनमा नदोहोरिने गरी क्षमायाचना गर्न समेत माग गरिएको छ। यस विषम घडीमा स्वास्थ्यका मापदण्डको पालना गरी आफु र आफ्नो परिवारलाई सुरक्षित राख्नु हुन कांगे्रस तनहुँले सबैमा अनुरोध गरेको छ । स्वास्थ्य सुरक्षाका मापदण्ड अपनाउदै पीडितलाई आवश्यक सहयोग गर्नुहुन पार्टीका सम्पूर्ण कार्यकर्ताहरुलाई अपिल समेत गरेको छ ।

यो संकटको घडीमा कमिसन र भ्रष्टाचारमा संलग्नलाई कडा कारवाही गर्न र नेपाली जनताको जीवन रक्षाका लागि अति आवश्यक अक्सिजन, आईसियु बेडका साथै कोभिड-१९ को निःशुल्क परीक्षण र भ्याक्सिनको व्यवस्था गर्न नेपाली कांग्रेस तनहुँ जोडदार माग गर्दछ जारी विज्ञप्तिमा भनिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर