प्रदेशमै उत्कृष्ट बन्यो डिभिजन वन कार्यालय तनहुँ
- भञ्ज्याङ समाचारदाता (दमौली)
गण्डकी प्रदेशमा डिभिजन वन कार्यालय तनहुँ उत्कृष्ट बन्न सफल भएको छ । प्रदेशभरका डिभिजन वन कार्यालयहरु मध्ये तनहुँलाई उत्कृष्टका रुपमा गण्डकी प्रदेश सरकारले पुरस्कृत गरेको छ ।
पोखरामा आयोजित प्रदेश सरकारको तेश्रो वार्षिकोत्सव समारोहमा मुख्यमन्त्री पृथ्वीसुब्बा गुरुङको उपस्थितीमा प्रदेश प्रमुख अमिक शेरचनले डिभिजन वन कार्यालय तनहुँका प्रमुख कोमलराज काफ्लेलाई पुरस्कृत गरेका थिए ।
कार्यालयलाई नगद २० हजार रुपैयाँ र प्रमाणपत्रका साथमा पुरस्कृत गरिएको छ । कार्यालयको एक वर्षो समग्र व्यवस्थापनका आधारमा यो कार्यालय उत्कृष्ट घोषणा गरिएको प्रदेश सरकारले जनाएको छ । सोही कार्यक्रममा कार्यालयका पूर्व प्रमुख एवं कास्की डिभिजन वन अधिकृत केदार बराललाई गण्डकी प्रदेशको प्रदेश निजामती सेवा पुरस्कारबाट पुरस्कृत गरिएको थियो ।
